ଭୁବନେଶ୍ୱର,୨୧/୧୧: ମଙ୍ଗଳବାର ଦକ୍ଷିଣ ଓ ଉପକୂଳ  ଓଡ଼ିଶାରେ ଆଂଶିକ ମେଘୁଆ ପାଗ ସହ ହାଲୁକା ବର୍ଷା ହୋଇପାରେ । ପାଣିପାଗ ବିଭାଗ କହିଛି, ମଙ୍ଗଳବାର  ଜଗତ୍‌ସିଂହପୁର, କେନ୍ଦ୍ରାପଡ଼ା,  ଖୋର୍ଦ୍ଧା, ପୁରୀ, ଗଜପତି, ଗଞ୍ଜାମ,  କନ୍ଧମାଳ, ରାୟଗଡ଼ା, ମାଲକାନଗିରି, କୋରାପୁଟ, ନବରଙ୍ଗପୁର,  କଳାହାଣ୍ଡି, କେନ୍ଦୁଝର ଓ ମୟୂରଭଞ୍ଜ  ଜିଲ୍ଲାରେ ଗୋଟିଏ ଦୁଇଟି ସ୍ଥାନରେ  ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି । କେତେକ ଜାଗାରେ ଘଡ଼ଘଡ଼ି ସହ ବର୍ଷା ହୋଇପାରେ ।  ବାକି ଅଞ୍ଚଳରେ ପାଗ ମୁଖ୍ୟତଃ  ଶୁଖିଲା ରହିପାରେ । 

ବୁଧବାରଠାରୁ  ୨୬ ତାରିଖ ପର୍ଯ୍ୟନ୍ତ ସାରା ରାଜ୍ୟରେ ପାଗ ଶୁଖିଲା ରହିବ । ଆସନ୍ତା  ୪ଦିନ ପର୍ଯ୍ୟନ୍ତ ରାତି ତାପମାତ୍ରାରେ  ବିଶେଷ ପରିବର୍ତ୍ତନ ସମ୍ଭାବନା ନାହିଁ । ସୋମବାର ଅନେକ ଜାଗାରେ ପାଗ  ଆଂଶିକ ମେଘୁଆ ଥିଲା । ପୁରୀ ଓ  ଗୋପାଳପୁରରେ ସାମାନ୍ୟ ବର୍ଷା ହୋଇଥିଲା । ଦିନ ତାପମାତ୍ରା  ପ୍ରାୟତଃ କମିଥିବାବେଳେ ରାତି  ତାପମାତ୍ରା ୧୬ରୁ ୨୦ ଡିଗ୍ରୀ  ପାଖାପାଖି ରହିଛି । କୋରାପୁଟରେ ସର୍ବନିମ୍ନ ତାପମାତ୍ରା ୧୨.୧,  ଦାରିଙ୍ଗିବାଡ଼ିରେ ୧୩.୫, ଫୁଲବାଣୀ  ୧୪.୫ ଡିଗ୍ରୀ ସେଲସିୟସ୍‌ ଥିଲା ।