ଭୁବନେଶ୍ଵର, ୨୫/୦୩ : ଠିକା ସଂସ୍ଥାର ଅବହେଳା ଯୋଗୁଁ ଚାଲିଗଲା ୩ ଜୀବନ। ଢେଙ୍କାନାଳ କାମାକ୍ଷାନଗର ରେକୁଳା ଠାରେ ସିରିଜ୍ ଦୁର୍ଘଟଣା ଘଟିଛି। ପୂର୍ତ୍ତ ବିଭାଗର ଜଣେ କର୍ମଚାରୀଙ୍କ ସମେତ ୩ ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ହୋଇଛନ୍ତି। ସ୍ଥାନୀୟ ଲୋକେ ଢେଙ୍କାନାଳ କାମାକ୍ଷାନଗର ରାସ୍ତା ଅବରୋଧ କରିଛନ୍ତି।
ସୂଚନାନୁଯାୟୀ, ସୋମବାର ରାତିରେ କମାକ୍ଷାନଗର ଉପଖଣ୍ଡରୁ ଢେଙ୍କାନାଳ ମୁଖ୍ୟରାସ୍ତାରେ ପୂର୍ତ୍ତ ବିଭାଗ ପକ୍ଷରୁ ରାସ୍ତା କାମ ଚାଲୁଥିଲା। ହେଲେ ସେଠାରେ କୌଣସି ସୂଚନା ଫଳକ କିମ୍ଵା ରୋଡ୍ ବ୍ରେକର୍ ଲଗାଯାଇ ନଥିଲା। ଫଳରେ ରେକୁଳା ଠାରେ ରାସ୍ତାରେ ଥୁଆ ହୋଇଥିବା ପିଚୁ ଟ୍ରକ୍କୁ ଏକ ବାଇକ୍ ଆସି ଧକ୍କା ଦେଇଥିଲା। ଫଳରେ ବାଇକ୍ ଚାଳକଙ୍କ ମୃତ୍ୟୁ ଘଟିଥିଲା। ଏହି ଘଟଣା ପରେ ପରେ ଆଉ ଏକ ହାଇୱା ଆସି ପିଚୁ ଟ୍ରକ୍କୁ ଧକ୍କା ଦେଇଥିଲା। ଫଳରେ କାର୍ଯ୍ୟ କରୁଥିବା ଜଣେ ଶ୍ରମିକଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଅନ୍ୟ ଜଣେ ଶ୍ରମିକ ସହିତ ପୂର୍ତ୍ତ ବିଭାଗର କ୍ଷୀରୋଦ ସାହୁ ନାମକ ଜଣେ ୪ର୍ଥ ଶ୍ରେଣୀ କର୍ମଚାରୀ ଗୁରୁତର ହୋଇଥିଲେ। ତାଙ୍କୁ କଟକ ସ୍ଥାନାନ୍ତର କରାଯାଇଥିଲା। ପରେ ଡାକ୍ତରଖାନାରେ କ୍ଷୀରୋଦଙ୍କର ମଧ୍ୟ ମୃତ୍ୟୁ ଘଟିଥିଲା। ତେବେ ମୃତାହତ ଶ୍ରମିକଙ୍କ ସଠିକ ପରିଚୟ ମିଳିପାରି ନଥିଲେ ମଧ୍ୟ ଜଣେ ପାଲଲହାଡ଼ା ଓ ଅନ୍ୟ ଜଣେ ମୟୂରଭଞ୍ଜ ଜିଲ୍ଲାର ବୋଲି କୁହାଯାଉଛି। ସେହିପରି ପୂର୍ତ୍ତ ବିଭାଗ କର୍ମଚାରୀ କ୍ଷୀରୋଦ ସ୍ଥାନୀୟ ରେକୁଳା ଗ୍ରାମର ହୋଇଥିବା ଜଣାପଡିଛି।
ଠିକା ସଂସ୍ଥାର ଏପରି ଖାମଖିଆଲି ମନୋଭାବକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଉତ୍ତ୍ୟକ୍ତ ଲୋକ ଦୁର୍ଘଟଣା ସ୍ଥଳରେ ରାସ୍ତା ଅବରୋଧ କରିଛନ୍ତି। ଫଳରେ ଢେଙ୍କାନାଳ ଓ କାମାକ୍ଷାନଗର ମଧ୍ୟରେ ଯୋଗାଯୋଗ ବାଧାପ୍ରାପ୍ତ ହୋଇଛି। କାମାକ୍ଷାନଗର ପୁଲିସ ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଛି।
ଏହି ଖବରଟିକୁ ପଢନ୍ତୁ- ଭିଜିଲାନ୍ସ ଜାଲରେ ଖୋର୍ଦ୍ଧା-ଜଟଣୀ ପୌରପରିଷଦ କାର୍ଯ୍ୟନିର୍ବାହୀ ଅଧିକାରୀ, ଏକକାଳୀନ ୯ଟି ସ୍ଥାନରେ ରେଡ୍
