କୋଣାର୍କ,୨୫।୯ : ପାଦରେ ଚାଲି ଚାଲି ତୀର୍ଥ ଯାତ୍ରା। ୨ ଜଣ ଯୁବକ ଏଭଳି ତୀର୍ଥଯାତ୍ରାରେ ବାହାରିଛନ୍ତି। ଯୁବକ ୨ ଜଣକ ହେଲେ ବିହାରର ବୈଶାଳୀ ଜିଲ୍ଲାର ଅକ୍ଷତ ସିଂ(୨୫) ଓ ମନିଷ ଆନନ୍ଦ(୨୮) । କେଦାରନାଥରୁ ଆରମ୍ଭ ହୋଇ ରାମେଶ୍ବରମରେ ତୀର୍ଥଯାତ୍ରା ଶେଷ ହେବ।
ଅକ୍ଷତ ଓ ମନିଷ ଗତ ଫେବୃଆରୀ ୧୮ ତାରିଖରୁ ବିହାର ବୈଶାଳୀରୁ ତୀର୍ଥ ଯାତ୍ରାରେ ବାହାରିଥିଲେ । ଏକ ବ୍ୟାଗରେ ନିତ୍ୟ ବ୍ୟବହାର ଜିନିଷକୁ ପିଠିରେ ଲଦି ଦୁଇଜଣ ଦୈନିକ ପ୍ରାୟ ୨୦କିମି ଯାତ୍ରା କରୁଛନ୍ତି। ୮ମାସରେ ବାବା କେଦାରନାଥ, କାଶୀ ବିଶ୍ଵନାଥ, ବଦ୍ରିନାଥ ,ବାବା ବୈଦନାଥଙ୍କୁ ଦର୍ଶନ କରି ଜଗନ୍ନାଥ ଧାମ ପୁରୀରେ ପହଞ୍ଚିଛନ୍ତି। ପୁରୀରୁ ବେଳାମାର୍ଗ ଦେଇ ବୁଧବାର ପୂର୍ବାହ୍ନରେ ପହଞ୍ଚିଥିଲେ ଅର୍କକ୍ଷେତ୍ର କୋଣାର୍କରେ। ଏଠାରେ ପହଞ୍ଚିବା ପରେ କୋଣାର୍କ ସୂର୍ଯ୍ୟମନ୍ଦିର ବୁଲିଥିଲେ। ସୂର୍ଯ୍ୟମନ୍ଦିରର ସୂକ୍ଷ୍ମ କାରୁକାର୍ଯ୍ୟ ବିମୋହିତ କରିଥିବା କହିଥିଲେ ଅକ୍ଷତ। ଏକ ବର୍ଷ ମଧ୍ୟରେ ତାମିଲନାଡୁର ରାମେଶ୍ବରମରେ ଯାତ୍ରା ଶେଷ ହେବା ନେଇ ଲକ୍ଷ୍ୟ ରଖିଛନ୍ତି। କିଛି ସମୟ କୋଣାର୍କରେ ଅତିବାହିତ କରିବା ପରେ ପୁଣି ପଦଯାତ୍ରାରେ ବାହାରିଥିଲେ ।