ଭୁବନେଶ୍ଵର, ୧୪/୦୩ : ଛତିଶଗଡ଼ ବିଜାପୁର ଜିଲ୍ଲାରେ ପୋଲିସକୁ ବଡ଼ ସଫଳତା। ଗାଙ୍ଗାଲୁର ଏରିଆ କମିଟି ମୁଖ୍ୟ ଦିନେଶ ମୋଡିଅମଙ୍କ ସହ ୧୭ ଜଣ ସକ୍ରିୟ ମାଓବାଦୀ ବିଜାପୁର ଏସପିଙ୍କ ନିକଟରେ ଆତ୍ମସମର୍ପଣ କରିଛନ୍ତି। ସେମାନଙ୍କ ମଧ୍ୟରେ ଜଣେ DVCM ମେମ୍ବର, ଦୁଇ ଜଣ ACM, ଦୁଇ ଜଣ ମିଲିସିଆ ପ୍ଲାଟୁନ୍ କମାଣ୍ଡର, ଜଣେ ଜନତାନା ସରକାର ସଭାପତି ରହିଛନ୍ତି। ଗାଙ୍ଗାଲୁର ଏରିଆ କମିଟି ଡିଭିସିଏମ୍ ଦିନେଶ ମୋଡିଅମ ଓ ତାଙ୍କ ଏସିଏମ୍ ପତ୍ନୀ ଜୋତି ତାଟିଙ୍କ ସହ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ଦିନେଶ ମୋଡିଅମ ଗତ ୨୦ ବର୍ଷ ଧରି ମାଓ ସଙ୍ଗଠନରେ ରହିଥିବା ବେଳେ ଗତ ପାଞ୍ଚ ବର୍ଷ ଧରି ଗାଙ୍ଗାଲୁର ଏରିଆ କମିଟିର କମାଣ୍ଡର ଭାବେ କାର୍ଯ୍ୟ କରୁଥିଲେ। ଦିନେଶର ମିଲିଟାରୀ ପ୍ଲାଟୁନ ଲାଗି ଗାଙ୍ଗାଲୁର ଜଙ୍ଗଲ ଭିତରେ ଦୀର୍ଘ ବର୍ଷ ଧରି ପ୍ରବେଶ କରିପାରୁନଥିଲେ ସୁରକ୍ଷାକର୍ମୀ।

ଆଭ୍ୟନ୍ତରୀଣ ଅଞ୍ଚଳରେ ନୂତନ ସୁରକ୍ଷା ଶିବିର ପ୍ରତିଷ୍ଠା ହେବା ସହିତ, ସରକାରଙ୍କ ବିକାଶମୁଖୀ କାର୍ଯ୍ୟ, ରାସ୍ତାର ସମ୍ପ୍ରସାରଣ, ପରିବହନ ସୁବିଧା, ପାଣି, ବିଦ୍ୟୁତ୍ ଏବଂ ସରକାରଙ୍କ ଅନ୍ୟାନ୍ୟ କଲ୍ୟାଣକାରୀ ଯୋଜନାଗୁଡ଼ିକ ଗ୍ରାମବାସୀଙ୍କ ପାଖରେ ପହଞ୍ଚିବା ଆରମ୍ଭ କରିଛି। ସୁରକ୍ଷାବାହିନୀର ଗ୍ରାମବାସୀଙ୍କ ସହିତ ସାକାରାତ୍ମକ ଆଲୋଚନା, କମ୍ୟୁନିଟି ପୋଲିସି ଅଧୀନରେ ଦିଆଯାଉଥିବା କଲ୍ୟାଣକାରୀ ଯୋଜନା ବିଷୟରେ ସୂଚନା ଏବଂ ଛତିଶଗଡ଼ ସରକାରଙ୍କ ଆତ୍ମସମର୍ପଣ ଏବଂ ପୁନର୍ବାସ ନୀତିର ବ୍ୟାପକ ପ୍ରଚାର ମାଓ ସଂଗଠନ ପ୍ରତି ନିରାଶା ସୃଷ୍ଟି କରିଛି ବୋଲି ମାଓନେତା ଦିନେଶ କହିଛନ୍ତି। ତେବେ ଆତ୍ମସମର୍ପଣ ପରେ ସମାଜର ମୁଖ୍ୟସ୍ରୋତରେ ସାମିଲ ହୋଇଥିବା ସମସ୍ତ ମାଓବାଦୀଙ୍କୁ ୨୫ ହଜାର ଟଙ୍କାର ଚେକ୍ ପ୍ରଦାନ କରାଯାଇଥିବା ବେଳେ ସରକାରଙ୍କ ନିୟମ ଅନୁସାରେ ସେମାନଙ୍କୁ ଥଇଥାନ କରାଯିବ ବୋଲି ବିଜାପୁର ଏସପି ଜିତେନ୍ଦ୍ର ଯାଦବ କହିଛନ୍ତି।

ମାଓବାଦୀଙ୍କୁ ମୂଳପୋଛ କରିବା ଲାଗି ତାରିଖ ଘୋଷଣା ହୋଇ ସାରିଥିବା ବେଳେ ଛତିଶଗଡ଼ରେ କମ୍ଵିଂ ଅପରେସନ ଜୋରଦାର୍ କରାଯାଉଛି। ସୁରକ୍ଷାକର୍ମୀଙ୍କ ଅପରେସନରେ ଶତାଧିକ ମାଓବାଦୀ ନିହତ ହେବା ପରେ ଲାଲବାହିନୀ ଭୟଭୀତ ହୋଇପଡ଼ିଛି। ଆତ୍ମସମର୍ପଣ କରିଥିବା ମୋଟ ୧୭ ଜଣ ମାଓବାଦୀଙ୍କ ମଧ୍ୟରୁ ୯ ଜଣଙ୍କ ମୁଣ୍ଡ ଉପରେ ୨୪ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲେ ଛତିଶଗଡ଼ ସରକାର। 

ଏହି ଖବରଟିକୁ ପଢନ୍ତୁ-ବନ୍ଧୁ ମିଳନରେ ଜମିଲା ଭୋଜିଭାତର ଆସର, ବିଷାକ୍ତ ଛତୁ ଏବଂ ପନିର୍ ଖାଇ ୨୨ ଅସୁସ୍ଥ