ହାଇଦ୍ରାବାଦ,୨୬/୦୨: ଦିନ ପରେ ଦିନ ଗଡୁଛି । ୪ ଦିନ ବିତିଗଲାଣି । ୯୦ ଘଣ୍ଟାରୁ ଅଧିକ ସମୟ ଧରି ଅନ୍ଧାରୀ ସୁଡଙ୍ଗରେ ଫଶି ରହିଛନ୍ତି ୮ ଶ୍ରମିକ । ତେଲେଙ୍ଗାନାର ନାଗରକୁର୍ଣ୍ଣୁଲ ଜିଲ୍ଲାରେ ନିର୍ମାଣଧୀନ ଶ୍ରୀଶୈଳମ ଲେଫ୍ଟ ବ୍ୟାଙ୍କ କେନାଲ (ଏସଏଲବିସି) ଟନେଲ ଭୁଶୁଡିବାକୁ ଇତିମଧ୍ୟରେ ୪ ଦିନ ବିତିଗଲାଣି । ହେଲେ ୮ ଶ୍ରମିକଙ୍କୁ ବାହାର କରିବା ସମ୍ଭବ ହୋଇନାହିଁ । ସମୟ ଗଡି ଯାଉଥିବାରୁ ଶ୍ରମିକଙ୍କୁ ସୁରକ୍ଷିତ ଉଦ୍ଧାର କରିବା ନେଇ ଆଶା ଆଶଙ୍କା ଦେଖା ଦେଇଛି । ଏବେ ବି ଉଦ୍ଧାରକାର୍ଯ୍ୟ ଜାରି ରହିଛି । ୪ ଦିନ ହେବ ଶ୍ରମିକ କେମିତି ଅଛନ୍ତି କଣ ଖାଉଥିବେ ତାକୁ ନେଇ ଏପରେ ପରିବାର ଚିନ୍ତାରେ ରହିଛି । ଗୋଟେ ଗୋଟେ ମିନିଟ୍ ସେମାନଙ୍କ ପାଇଁ ଗୁରୁତ୍ବପୂର୍ଣ୍ଣ ହୋଇଛି ।
ଚ୍ୟାଲେଞ୍ଜ ପାଲଟିଛି ଶେଷ ୪୦ ମିଟର- ଗତ ୨୨ ତାରିଖରେ ଟନେଲ ଭୁଶୁଡି ପଡିଥିଲା । ସମୟ ପରେ ସମୟ ଗଡୁଛି । ମଉଳୁଛି ଆଶା । ବଢୁଛି ଆଶଙ୍କା । ତେଲେଙ୍ଗାନା ଟ୍ରେନ ଭୁଶୁଡିବା ଘଟଣାକୁ ୯୦ ଘଣ୍ଟାରୁ ଅଧିକ ସମୟ ବିତିଲାଣି । ଅନବରତ ଖୋଳା ଚାଲିଛି ହେଲେ ଅନ୍ଧାରୀ ସୁଡଙ୍ଗରେ ଫସିଥିବା ୮ ଶ୍ରମିକଙ୍କ ସହ କୌଣସି ଯୋଗାଯୋଗ ହୋଇପାରୁନାହିଁ । ଉଦ୍ଧାରକାର୍ଯ୍ୟରେ ଏନଡିଆରଏଫ, ଏସଡିଆରଏଫ, ଭାରତୀୟ ସେନା, ମେରାଇନ କମାଣ୍ଡ ଫୋର୍ସ, ନୌସେନା, ଜିଏସଆଇ ସମେତ ୬ ରାଟ୍ ମାଇନର ନିୟୋଜିତ ହୋଇଛନ୍ତି । ହେଲେ ବାଟ ଓଗାଳିଛି ୪୦ ମିଟିର । ଉଦ୍ଧାରକାରୀ ଟିମଙ୍କ ପାଇଁ ଚ୍ୟାଲେଞ୍ଜ ପାଲଟିଛି ଶେଷ ୪୦ ମିଟର । ସୁଡଙ୍ଗରୁ ଖାଲି ପାଣି ଓ କାଦୁଅ ବାହାରୁଛି । ଏହାକୁ ହଟାଇବା ରେସ୍କ୍ୟୁ ଟମ୍ ପାଇଁ କଷ୍ଟକର ହୋଇଛି ।
ଟନେଲ ଟ୍ରାଜେଡିକୁ ନେଇ ରାଜନୀତି- ଅନ୍ଧାରୀ ସୁଡଙ୍ଗରେ ଫସି ରହିଛି ୮ ଜୀବନ । ଦିନ ଗଡୁଛି ହେଲେ ଉଦ୍ଧାର ହୋଇପାରୁନାହାନ୍ତି ଶ୍ରମିକ । ଟନେଲ ଟ୍ରାଜେଡିକୁ ନେଇ ତେଲେଙ୍ଗାନାରେ ରାଜନୀତି ଜୋର ଧରିଛି । ବିରୋଧୀ ଦଳ ଭାରତ ରାଷ୍ଟ୍ର ସମିତି (ବିଆରଏସ) କଂଗ୍ରେସ ଶାସିତ ରାଜ୍ୟ ସରକାରଙ୍କୁ ଟାର୍ଗେଟ କରିଛି । ବିଆରଏସ ସଭାପତି କେଟି ରାମା ରାଓ ରାଜ୍ୟ ସରକାରଙ୍କୁ ଟାର୍ଗେଟ କରି ଜିଏସଆଇ ଅନୁମତି ବିନା ନିର୍ମାଣ କାର୍ଯ୍ୟ ଚାଲିଥିବା କହିଛନ୍ତି । ଫସି ରହିଥିବା ଶ୍ରମିକଙ୍କ ଉପରେ ସଙ୍କଟ ବଢୁଛି । ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଉଦ୍ଧାରକାର୍ଯ୍ୟକୁ ପ୍ରାଥମିକତା ଦେବା ପରିବର୍ତ୍ତେ ନିର୍ବାଚନ ପ୍ରଚାରରେ ଅଧିକ ଧ୍ୟାନ ଦେଉଛନ୍ତି କହି ସମାଲୋଚନା କରିଛନ୍ତି ।
ସେପଟେ ବିଆରଏସକୁ ଜବାବ ଦେଇ କଂଗ୍ରେସ ନେତା ଚମଲା କିରମ କୁମାର ରେଡ୍ଡୀ କହିଛନ୍ତି, ''ବିରୋଧୀ ଦଳ ହିସାବରେ ଜନତାଙ୍କ କଲ୍ୟାଣ ପାଇଁ ସରକାରଙ୍କୁ ପ୍ରଶ୍ନ କରିବା ସେମାନଙ୍କର ସମ୍ପୂର୍ଣ୍ଣ ଅଧିକାର ରହିଛି । ହେଲେ ବର୍ତ୍ତମାନ ପରସ୍ପର ସହ ଯୁକ୍ତି କରିବ ସମୟ ନୁହେଁ । ସେ ୮ଜଣ ଶ୍ରମିକ କିପରି ସୁରକ୍ଷିତ ଉଦ୍ଧାର ହେବେ ତାର ଉପାୟ ଧ୍ୟାନ ଦେବ ଦରକାର । ରାଜନୈତିକ ମତଭେଦକୁ ପାଶୋରୀ ଉଦ୍ଧାର ଦିଗରରେ ଧ୍ୟାନ ଦେବା ଉଚିତ୍ ।''
