ନୂଆଦିଲ୍ଲୀ,୦୯/୦୫: ଉତ୍ତରାଖଣ୍ଡ ଜଙ୍ଗଲରେ ଲାଗିଥିବା ନିଆଁ ଯୋଗୁ ସ୍ଥିତି ଚିନ୍ତାଜନକ ହୋଇଛି । ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯିବା ସତ୍ତେ୍ୱ ବନାଗ୍ନି ନିୟନ୍ତ୍ରଣରେ ସଂପୂର୍ଣ୍ଣ ସଫଳତା ମିଳିପାରୁନାହଁ । ଇତିମଧ୍ୟରେ ଏହି ପ୍ରସଙ୍ଗ ବୁଧବାର ସୁପ୍ରିମକୋର୍ଟରେ ଶୁଣାଣି ହୋଇଥିବାବେଳେ ଜଷ୍ଟିସ୍ ବିଆର ଗବଇ ଓ ଜଷ୍ଟିସ୍ ସନ୍ଦୀପ ମେହତାଙ୍କ ଖଣ୍ଡପୀଠ ଏଥିନେଇ ଉଦ୍ବେଗ ପ୍ରକାଶ କରିଥିଲେ ।
ଉତ୍ତରାଖଣ୍ଡ ସରକାରଙ୍କୁ ଖଣ୍ଡପୀଠ କହିଥିଲେ, ବର୍ଷା କିମ୍ବା କୃତ୍ରିମ ବର୍ଷା ଉପରେ ନିର୍ଭର କରି ରହିହେବନାହିଁ । ନିଆଁ ଲିଭାଇବା ଲାଗି ବିକଳ୍ପ ପ୍ରଭାବଶାଳୀ ଉପାୟ ବାହାର କର । ଏହି ସମୟରେ ରାଜ୍ୟ ସରକାରଙ୍କ ଓକିଲ ଦର୍ଶାଇଥିଲେ ଯେ, ନଭେମ୍ବର ୨୦୨୩ରୁ ଅଦ୍ୟାବଧି ଜଙ୍ଗଲରେ ନିଆଁ ଲାଗିବାର ୩୯୮ଟି ଘଟଣା ଘଟିଛି । ପ୍ରତିଥର ଏହି ନିଆଁ ଲୋକଙ୍କ ଦ୍ୱାରା ଲଗାଯାଇଛି । ନିଆଁ ଲାଗିବା ନେଇ ୩୫୦ ଅପରାଧିକ ମାମଲା ରୁଜୁ କରାଯାଇଛି । ସେଥିରେ ୬୨ ଜଣଙ୍କ ନାମ ରହିଛି । ଲୋକମାନେ ରାଜ୍ୟର ୪୦ପ୍ରତିଶତ ଅଞ୍ଚଳ ନିଆଁ ଘେରରେ ଥିବା କଥା କହୁଛନ୍ତି । କିନ୍ତୁ ପାହାଡ଼ିଆ ଅଞ୍ଚଳରେ ମାତ୍ର ୦.୧ ପ୍ରତିଶତ ଅଂଶରେ ହିଁ ନିଆଁ ଲାଗିଛି ।
ରାଜ୍ୟ ସରକାର ମାମଲାର ଅନ୍ତରୀଣ ଷ୍ଟାଟସ୍ ରିପୋର୍ଟ ମଧ୍ୟ କୋର୍ଟରେ ଦାଖଲ କରିଥିଲେ । ତେବେ ବରିଷ୍ଠ ଓକିଲ ତଥା ଏହି ମାମଲାରେ ଆବେଦନକାରୀ ଥିବା ରାଜୀବ ଦତ୍ତ ରାଜ୍ୟ ସରକାର ଦର୍ଶାଉଥିବାଠାରୁ ପରିସ୍ଥିତି ଅଧିକ ଗୁରୁତର ବୋଲି କହିଥିଲେ । ଉଭୟ ପକ୍ଷର ଯୁକ୍ତିକୁ ଶୁଣିବା ପରେ କୋର୍ଟ ରାଜ୍ୟ ସରକାରଙ୍କୁ ଅଦ୍ୟାବଧି ଏ ନେଇ କ’ଣ ପଦକ୍ଷେପ ନିଆଯାଇଛି ତାର ରିପୋର୍ଟ ସେଣ୍ଟ୍ରାଲ ଏମ୍ପାୱାର୍ଡ କମିଟି(ସିଇସି)ଙ୍କ ସହିତ ସେୟାର କରି ସିଇସିଙ୍କଠାରୁ ମତାମତ ନେବାକୁ ନିର୍ଦ୍ଦେଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ମେ ୧୫ରେ ହେବ ।
ଉତ୍ତରାଖଣ୍ଡରେ ଏପ୍ରିଲ ମାସର ପ୍ରଥମ ସପ୍ତାହରୁ ଲାଗିଥିବା ନିଆଁ ଯୋଗୁ ଅଦ୍ୟାବଧି ୧୧ଟି ଜିଲ୍ଲା ପ୍ରଭାବିତ ହୋଇଛି । ସେଥିମଧ୍ୟରେ ଗଡ଼ୱାଲ ମଣ୍ଡଳର ପୌଡ଼ି ରୁଦ୍ରପ୍ରୟାଗ, ଚମୋଲି, ଉତ୍ତରକାଶୀ, ଟିହରି ଅଧିକ ପ୍ରଭାବିତ ହୋଇଥିବାବେଳେ ଡେରାଡୁନ୍ର କିଛି ଅଞ୍ଚଳ ସାମିଲ ରହିଛି । ସେହିପରି କୁମାଉଁ ମଣ୍ଡଳରେ ନୈନିତାଲ, ଚମ୍ପାୱତ୍, ଅଲମୋରା, ବାଗେଶ୍ୱର ଓ ପିଥୋରଗଡ଼ ଅଧିକ ପ୍ରଭାବିତ ହୋଇଥିବା ସୂଚନା ମିଳିଛି । ଜଙ୍ଗଲ ନିଆଁକୁ ଲିଭାଇବା ସମୟରେ ୫ ଜଣଙ୍କର ମୃତ୍ୟୁ ହୋଇଛି । ୪ ଜଣ ଗୁରୁତର ଭାବେ ଆହତ ହୋଇଛନ୍ତି । ନିଆଁ ଯୋଗୁ ୧୩୧୬ ହେକ୍ଟର ଜଙ୍ଗଲ ଜଳିସାରିଛି । ନିଆଁ ଲିଭା କାର୍ଯ୍ୟରେ ବନ ବିଭାଗ, ଅଗ୍ନିଶମ ବାହିନୀ, ପୁଲିସ ସହିତ ସେନାର ଯବାନ ଲାଗିଛନ୍ତି । ସେନା ଅଞ୍ଚଳ ନିକଟରେ ନିଆଁ ପହଞ୍ଚୁଥିବାର ଦେଖି ବାୟୁସେନାର ଏମ୍ଆଇ-୧୭ ହେଲିକପ୍ଟରର ସହାୟତା ନିଆଯାଇଛି । ରୁଦ୍ରପ୍ରୟାଗରେ ୩ ଜଣ ଲୋକଙ୍କୁ ନିଆଁ ଲଗାଇବା ଅଭିଯୋଗରେ ଗିରଫ କରାଯାଇଛି ।