ମୁମ୍ବାଇ, ୧୦।୫: କଳା, ବିଜ୍ଞାନ ଏବଂ ଚଳଚ୍ଚିତ୍ର ନିର୍ମାଣର କଳାକାରମାନଙ୍କୁ ଉତ୍ସର୍ଗୀକୃତ ଏକାଡେମୀ ମ୍ୟୁଜିୟମ୍ ଅଫ୍ ପିକ୍ଚର୍ସ ଭାରତୀୟ ସିନେମାର ସଙ୍ଗୀତ ଉତ୍ସବ ପାଳନ କରିବାକୁ ପ୍ରସ୍ତୁତ । ଏନେଇ ସୋସିଆଲ ମିଡିଆରେ ଏକ ପୋଷ୍ଟ ମାଧ୍ୟମରେ 'ଆରଆରଆର (୨୦୨୨)', 'ସ୍ଲମଡଗ ମିଲେନିଅର(୨୦୦୮) ' ଏବଂ 'ଲଗନ(୨୦୦୧)'ର ମ୍ୟୁଜିକ ଉତ୍ସବ ପାଳନ କରିବାକୁ ଏକାଡେମୀ ସଂଗ୍ରହାଳୟ ଏକ କାର୍ଯ୍ୟକ୍ରମ ଘୋଷଣା କରିଛି ।
ଏକାଡେମୀ ନିଜ ଇନଷ୍ଟାଗ୍ରାମରେ ଏହି ତିନୋଟି ଚଳଚ୍ଚିତ୍ରର ପୋଷ୍ଟର ସେୟାର କରିବା ସହ କ୍ୟାପସନରେ ଲେଖିଛନ୍ତି, 'ମେ ୧୮ ଶନିବାର ଦିନ ସନ୍ଧ୍ୟା ସାଢେ ୬ଟାରେ ଆମେ ଭାରତୀୟ ସିନେମା ଜଗତର ଲୋକପ୍ରିୟ ଫିଲ୍ମ 'ଆରଆରଆର (୨୦୨୨)', 'ସ୍ଲମଡଗ୍ ମିଲେନିଅର(୨୦୦୮) ' ଏବଂ 'ଲଗନ(୨୦୦୧)'ର ମ୍ୟୁଜିକ ଉତ୍ସବ ପାଳନ କରିବାକୁ ଯାଉଛୁ । ମେ ୧୮ ସନ୍ଧ୍ୟା ସାଢ଼େ ୬ଟାରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମରେ ବଲିପପ୍ ଏବଂ ସାଦୁବାସଙ୍କ ଏକ ଲାଇଭ୍ ତବଲା ଏବଂ ନୃତ୍ୟ ପ୍ରଦର୍ଶନ ଅନ୍ତର୍ଭୁକ୍ତ ହେବ ଯେଉଁଥିରେ ତିନୋଟି ଚଳଚ୍ଚିତ୍ରର ସଂଗୀତ ପରିବେଷଣ କରାଯିବ ।
ଭାରତ ଉପରେ ଆଧାରିତ 'ସ୍ଲମଡଗ୍ ମିଲେନିଅର'ରେ ଅନୀଲ କପୁର, ସ୍ୱର୍ଗତ ଅଭିନେତା ଇରଫାନ ଖାନ, ଦେବ ପଟେଲ ଏବଂ ଫ୍ରାଇଡା ପିଣ୍ଟୋଙ୍କ ସମେତ ଅନେକ କଳାକାର ଅଭିନୟ କରିଛନ୍ତି । ଶ୍ରେଷ୍ଠ ନିର୍ଦ୍ଦେଶକ ପାଇଁ ଡାନି ବଏଲେଙ୍କ ସମେତ ଶ୍ରେଷ୍ଠ ଫଟୋ, ଶ୍ରେଷ୍ଠ ସମ୍ପାଦନା, ଶ୍ରେଷ୍ଠ ସାଉଣ୍ଡ ଏଡିଟିଂ ପାଇଁ ୨୦୦୯ରେ ଏହା ଅନେକ ଓସ୍କାର ଜିତିଥିବାବେଳେ ସଂଗୀତକାର ଏ ଆର ରେହମାନ 'ଜୟ ହୋ' ପାଇଁ ଶ୍ରେଷ୍ଠ ଅରିଜିନାଲ ଗୀତ ପାଇଁ ଓସ୍କାର ପାଇଥିଲେ । ସେହିପରି ୨୦୨୩ ରେ ନାଟୁ ନାଟୁ ପାଇଁ ଶ୍ରେଷ୍ଠ ଅରିଜିନାଲ ଗୀତ ଭାବେ ଏସଏସ ରାଜାମୌଲିଙ୍କ ଫିଲ୍ମ ଆରଆରଆର ଓସ୍କାର ପାଇଥିଲା ।
ଏକାଡେମୀ ନିକଟରେ ୯୭ ତମ ଓସ୍କାର ଘୋଷଣା କରିଥିଲା । ମାର୍ଚ୍ଚ ୨, ୨୦୨୫ରେ ୯୭ତମ ଓସ୍କାର ଅନୁଷ୍ଠିତ ହେବ, ଯାହା ମାର୍ଚ୍ଚ ୩ ସକାଳ ସମୟରେ ଭାରତରେ ପ୍ରସାରଣ କରାଯିବ । ଏହି କାର୍ଯ୍ୟକ୍ରମ ପୁଣି ଥରେ ହଲିଉଡର ଡଲବି ଥିଏଟରରେ ଅନୁଷ୍ଠିତ ହେବ । ତେବେ ବିଶ୍ୱ ସ୍ତରରେ ୨୦୦ରୁ ଅଧିକ ଦେଶର କଳାକାର ଅଂଶଗ୍ରହଣ କରିବେ ବୋଲି ଆଶା କରାଯାଉଛି ।