ନୂଆଦିଲ୍ଲୀ,୨୩/୦୪: ବିକ୍ରି ହ୍ରାସ ଏବଂ ବର୍ଦ୍ଧିତ ପ୍ରତିଯୋଗିତା ଯୋଗୁ  ଆମେରିକୀୟ ଇ-ଯାନ ନିର୍ମାତା ଟେସ୍‌ଲା ଚୀନ୍‌ ଏବଂ ଜର୍ମାନି ସମେତ କେତେକ  ବଜାରରେ ଏହାର ଇଭି ଦର କମାଇଛି ।  ପୂର୍ବରୁ ଏହା ଆମେରିକାରେ ଦରହ୍ରାସ  କରିଥିଲା । ୪ ବର୍ଷ ମଧ୍ୟରେ ପ୍ରଥମ ଥର ପାଇଁ କମ୍ପାନିର ବିକ୍ରି କମିଛି । ଚଳିତ  କ୍ୟାଲେଣ୍ଡର ବର୍ଷର ପ୍ରଥମ ତ୍ରୟମାସରେ  ସମଗ୍ର ବିଶ୍ୱରେ କମ୍ପାନିର ବିକ୍ରି ହ୍ରାସ  ପାଇଛି । ଚାଇନିଜ୍‌ ଇଭି ନିର୍ମାତାମାନେ  ଅତ୍ୟନ୍ତ ପ୍ରତିଯୋଗିତାମୂଳକ ଦରରେ  ଇଭି ଉପଲବ୍ଧ କରୁଥିବାବେଳେ ଟେସ୍‌ଲା ପାଇଁ ଏହା ଅଡୁଆ ପରିସ୍ଥିତି ସୃଷ୍ଟି କରିଛି । 

ପ୍ରକାଶଯୋଗ୍ୟ, ଚୀନ୍‌ରେ କମ୍ପାନିର  ମଡେଲ-୩ ଦର ୧୪,୦୦୦ ୟୁଆନ୍‌  ବା ୧୯୩୦ ଡଲାର ଖସି ୨୩୧,୯୦୦  ୟୁଆନ ବା ୩୨,୦୦୦ ଡଲାର ହୋଇଛି ।  ସେହିଭଳି ଜର୍ମାନିରେ ମଡେଲ  ୩ ରିୟର ହ୍ୱିଲ୍‌ ଡ୍ରାଇଭ୍‌ ଦରରେ  ୪୦,୯୯୦ ୟୁରୋ ହ୍ରାସ ଘଟିଛି । ଫଳରେ ଏହା ୪୩,୬୭୦.୭୫ ଡଲାର  ବା ୪୨,୯୯୦ ୟୁରୋକୁ ଖସିଆସିଛି । ୟୁରୋପ, ମଧ୍ୟପ୍ରାଚ୍ୟ ଏବଂ ଆଫ୍ରିକାରେ  ମଧ୍ୟ ଟେସ୍‌ଲା ଗାଡ଼ି ଦର କମିଥିବା  କମ୍ପାନିର ଜଣେ ମୁଖପାତ୍ର ସୂଚନା  ଦେଇଛନ୍ତି । କମ୍ପାନି ପକ୍ଷରୁ ଶୁକ୍ରବାର  ଆମେରିକାରେ ମଡେଲ ୱାଇ, ମଡେଲ ଏକ୍ସ ଏବଂ ମଡେଲ ଏସ୍‌ ଗାଡ଼ି ଦର  ହ୍ରାସ ଘୋଷଣା କରାଯାଇଥିଲା ।