ନୂଆଦିଲ୍ଲୀ: ଇଣ୍ଡିଆନ ଓଭରସିଜ୍ କଂଗ୍ରେସର ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି ସାମ୍ ପିଟ୍ରୋଡା ।ତାଙ୍କର ଇସ୍ତଫା ପତ୍ର କଂଗ୍ରେସ ଗ୍ରହଣ କରିନେଇଥିବା ନେଇ ସୂଚନା ଦେଇଛନ୍ତି ବରିଷ୍ଠ ନେତା ଜୟରାମ ରମେଶ । ସେ ଏକ୍ସରେ ପୋଷ୍ଟ କରି ଲେଖିଛନ୍ତି, ‘ସାମ ପିଟ୍ରୋଡା ଖୋଦ ଇସ୍ତଫା ଦେଇଛନ୍ତି ଏବଂ ତାଙ୍କର ଏହି ଇସ୍ତଫା କଂଗ୍ରେସ ଗ୍ରହଣ କରିନେଇଛି ।’ ଜୟରାମ ରମେଶଙ୍କୁ ଏହି ପୋଷ୍ଟକୁ ରିପୋଷ୍ଟ କରିଛନ୍ତି ସାମ ପିଟ୍ରୋଡା । ତେବେ ଇଣ୍ଡିଆନ୍ ଓଭରସିଜ୍ କଂଗ୍ରେସର ପୂର୍ବତନ ଅଧ୍ୟକ୍ଷ ସାମ ପିଟ୍ରୋଡାଙ୍କ ଏକ ଭିଡିଓକୁ ନେଇ ଭାରତରେ ବିବାଦ ତୀବ୍ର ହେବା ପରେ ସେ ଇସ୍ତଫା ଦେଇଛନ୍ତି ।
ଗତକାଲି ତାଙ୍କର ଏକ ଭିଡିଓ ସାମ୍ନାକୁ ଆସିଥିଲା । ଯେଉଁଥିରେ ସାମ ପିଟ୍ରୋଡା ଭାରତର ବିଭିନ୍ନ ସ୍ଥାନର ଲୋକମାନଙ୍କ ଉପରେ ବର୍ଣ୍ଣବୈଷମ୍ୟ ସଂପର୍କିତ ମନ୍ତବ୍ୟ ଦେଇଥିଲେ । ଭିନ୍ନ ଭିନ୍ନ ଅଞ୍ଚଳର ଲୋକଙ୍କ ଶରୀରର ରଙ୍ଗକୁ ନେଇ ଚୀନ୍, ଆଫ୍ରିକା, ୟୁରୋପ ସହିତ ତୁଳନା କରିଥିଲେ । ପୂର୍ବ ଭାରତର ଲୋକଙ୍କୁ ଚୀନ୍, ଦକ୍ଷିଣ ଭାରତର ଲୋକଙ୍କୁ ଆଫ୍ରିକୀୟ ଲୋକଙ୍କ ସହିତ ତୁଳନା କରିବା ସହ ପଶ୍ଚିମ ଭାରତର ଲୋକ ଆରବବାସୀଙ୍କ ପରି ଦେଖାଯାଉଥିବା ନେଇ କହିଥିଲେ ସାମ ପିଟ୍ରୋଡା । ଏହାକୁ ନେଇ କଂଗ୍ରେସ ଉପରେ ଖୁବ ବର୍ଷିଥିଲା ବିଜେପି । ଏହା ପରେ କଂଗ୍ରେସ ପିଟ୍ରୋଡାଙ୍କ ମନ୍ତବ୍ୟ ସହ ଦଳର ସଂପର୍କ ନାହିଁ ବୋଲି କହିଥିଲା ।
ସେପଟେ କଂଗ୍ରେସ ନେତା ଜୟରାମ ରମେଶ ଏକ୍ସ ପୋଷ୍ଟ ମାଧ୍ୟମରେ କହିଛନ୍ତି ଯେ, ‘ପିଟ୍ରୋଡା ଭାରତର ବିବିଧତାକୁ ଦର୍ଶାଇବାକୁ ଯାଇ ଯେଉଁଭଳି ତୁଳନାତ୍ମକ ଉଦାହରଣ ଦେଇଛନ୍ତି ତାହା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ । ଭାରତୀୟ କଂଗ୍ରେସ ଏଭଳି ଅପମାନସୂଚକ ଟିପ୍ପଣୀ ପାଖରୁ ନିଜକୁ ଦୂରେଇ ରଖୁଛି ।’