ବେଙ୍ଗାଲୁରୁ: ଫାଫ୍ ଡୁପ୍ଲେସିସ୍ଙ୍କ ବିସ୍ଫୋରକ ବ୍ୟାଟିଂ ଆରସିବିକୁ ବିଜୟୀ କରିଛି । ଗୁଜରାଟ ବିପକ୍ଷ ମ୍ୟାଚ୍ରେ ଆରସିବି ୧୩.୪ ଓଭରରେ ୧୫୨ ରନ୍ କରିବା ସହ ଲକ୍ଷ୍ୟ ହାସଲ କରିଛି । ୧୪୮ ରନ୍ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଆସିଥିବା ଆରସିବିର ଦୁଇ ଓପନର ବିରାଟ କୋହଲି ଏବଂ ଫାଫ୍ ଡୁପ୍ଲେସିସ୍ ଭଲ ଆରମ୍ଭ ଦେଇଥିଲେ । ୨୩ ବଲ୍ରୁ ୩ ଛକା ଏବଂ ୧୦ଟି ଚୌକା ମାରି ୬୪ ରନ୍ କରି ଆଉଟ୍ ହୋଇଥିଲେ ଫାଫ୍ । ସେହିଭଳି ବିରାଟ କୋହଲି ୨୭ ବଲ୍ରେ ୪୨ ରନ୍ କରିଥିଲେ।
ଏମିତି ଲାଗୁଥିଲା ଯେମିତି ଆରସିବି ମାତ୍ର ୧୦ ଓଭରରେ ବିଜୟ ଲକ୍ଷ୍ୟ ହାସଲ କରିନେବ । କିନ୍ତୁ ଡୁପ୍ଲେସିସି ଆଉଟ ହୋଇଯିବା ପରେ ଗୋଟିଏ ପରେ ଗୋଟିଏ ଓ୍ବିକେଟ ହରାଇଥିଲା ଆରସିବି । ଶେଷରେ ଦୀନେଶ କାର୍ତ୍ତିକ ସବୁଥର ଭଳି ଏଥର ଭଲ ପ୍ରଦର୍ଶନ କରିଥିଲେ। ଡିକେଙ୍କ ଅପରାଜିତ ୨୧ ରନ୍ ବଳରେ ଆରସିବି ୬ ଓ୍ବିକେଟ ବିନିମୟରେ ବିଜୟୀ ହୋଇଛି । ସେପଟେ ଗୁଜରାଟ ଟାଇଟନ୍ସ ପକ୍ଷରୁ ଜୋଶୁଆ ଲିଟିଲ୍ ୪ଟି ଓ୍ବିକେଟ ନେଇଥିବା ବେଳେ ନୂର ଅହମ୍ମଦ ୨ଟି ଓ୍ବିକେଟ ନେଇଛନ୍ତି ।
ଆଇପିଏଲ ୨୦୨୪ର ୫୨ ତମ ମ୍ୟାଚ୍ରେ ଖରାପ ପ୍ରଦର୍ଶନ କରିଥିଲା ଶୁଭମନ ଗିଲଙ୍କ ନେତୃତ୍ବାଧୀନ ଟିମ୍ ଗୁଜରାଟ ଟାଇଟନ୍ସ । ଦଳ ୧୯.୩ ଓଭରରେ ସମସ୍ତ ଓ୍ବିକେଟ ହରାଇ ମାତ୍ର ୧୪୭ ରନ୍ କରିଥିଲା ଦଳ । ଆଜିର ମ୍ୟାଚ୍ରେ ଅଧିନାୟକ ଶୁଭମନ ଗିଲ ୨ ରନ୍ କରି ଆଉଟ ହୋଇଥିଲେ । ସେହିଭଳି ରିଦ୍ଧିମାନ ଶାହ ୧ ଏବଂ ସାଇ ସୂଦର୍ଶନ ୬ ରନ୍ କରି ପ୍ୟାଭିଲିୟନ୍ ଫେରିଥିଲେ ।
ଶାହରୁଖ ଖାନ(୩୭), ଡେଭିଡ ମିଲିର (୩୦), ରାହୁଲ ତେଓ୍ବତିଆ (୩୫), ରାଶିଦ ଖାନ (୧୮), ବିଜୟ ଶଙ୍କର (୧୦) ଓ ମାନବ ସୁତାର(୧) ବଳରେ ଦଳ ୧୪୭ ରନ୍ କରିଥିଲା । ସେହିଭଳି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଆଗରେ ଥିଲା ୧୪୮ ରନ୍ର ବିଜୟ ଲକ୍ଷ୍ୟ । ଏହି ଲକ୍ଷ୍ୟକୁ ସହଜରେ ହାସଲ କରିନେଇଛି ଆରସିବି ।
ଆଜିର ମ୍ୟାଚରେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ଆରସିବି । ଟିମର ବୋଲର କମାଲ ପ୍ରଦର୍ଶନ କରିଥିଲେ । ମହମ୍ମଦ ସିରାଜ, ୟଶ ଦୟାଲ ଏବଂ ବିଜୟକୁମାର ବୈଶାଖ ଦୁଇଟି ଲେଖାଏଁ ଓ୍ବିକେଟ ନେଇଥିଲେ । ସେହିଭଳି କ୍ୟାମେରନ୍ ଗ୍ରୀନ୍ ଏବଂ କର୍ଣ୍ଣ ଶର୍ମା ୧ଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ ।
