ସମ୍ବଲପୁର,୦୯/୦୫: ଗତ ୨୦୧୯ ସାଧାରଣ ନିର୍ବାଚନରେ ତତ୍କାଳୀନ ବିଜେଡି ନେତ୍ରୀ ଡାକ୍ତର ରାସେଶ୍ୱରୀ ପାଣିଗ୍ରାହୀ ଏବଂ ବିଜେପି ନେତା ଜୟନାରାୟଣ ମିଶ୍ରଙ୍କ ମଧ୍ୟରେ କଡା ମୁକାବିଲା ହୋଇଥିଲା । ପ୍ରତିଦ୍ୱନ୍ଦ୍ୱିତା ଏଭଳି ସ୍ତରକୁ ଯାଇଥିଲା ଯେ, ତାହା ଏକପ୍ରକାର ବ୍ୟକ୍ତିଗତ ଆକ୍ଷେପ ପ୍ରତି ଆକ୍ଷେପ ସ୍ତରରେ ପହଞ୍ଚିଥିଲା । ହେଲେ ବୁଧବାର ସେହି ଦୁଇ ନେତାନେତ୍ରୀଙ୍କ ସାକ୍ଷାତ ଘଟଣା ସମ୍ବଲପୁରର ରାଜନୀତିକୁ ସରଗରମ କରି ଦେଇଛି । ପ୍ରାୟ ୨ ସପ୍ତାହ ପୂର୍ବରୁ ରାସେଶ୍ୱରୀ ଟିକଟରୁ ବଞ୍ଚିତ ହୋଇ ବିଜେଡିରୁ ଇସ୍ତଫା ଦେଇଥିବା ବେଳେ ଏକପ୍ରକାର ରାଜନୈତିକ ସନ୍ୟାସ ଘୋଷଣା କରିଛନ୍ତି । ତେବେ, କିଛି ଦିନ ପୂର୍ବରୁ ତାଙ୍କୁ କେନ୍ଦ୍ରମନ୍ତ୍ରୀ ତଥା ବିଜେପିର ସମ୍ବଲପୁର ଲୋକସଭା ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ ବାସଭବନକୁ ଯାଇ ସାକ୍ଷାତ କରି ଆର୍ଶୀବାଦ ଲୋଡିଥିଲେ । ଆଉ ତାଙ୍କ ପାରମ୍ପାରିକ ପ୍ରତିଦ୍ୱନ୍ଦ୍ୱୀ ଜୟନାରାୟଣ ମିଶ୍ର ସାକ୍ଷାତ କରି ଆଲୋଚନା କରିବା ଘଟଣା ସମ୍ବଲପୁରର ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି ।
ବିଶେଷ କରି ବର୍ତ୍ତମାନ ସୁଦ୍ଧା ରାସେଶ୍ୱରୀ କୌଣସି ଦଳରେ ଯୋଗ ଦେଇନଥିବା ବେଳେ ତାଙ୍କ ସମର୍ଥକ ମାନେ ବି ବିଧିବଦ୍ଧ ଭାବେ କୌଣସି ଦଳରେ ସାମିଲ ହୋଇନାହାନ୍ତି । ଏହି ପରିପ୍ରେକ୍ଷୀରେ ବିଜେପି ରାସେଶ୍ୱରୀ ଗୋଷ୍ଠୀର ଭୋଟ ହାତେଇବାକୁ ଭରପୁର ଉଦ୍ୟମ କରୁଥିବା ଚର୍ଚ୍ଚା ହେଉଛି । ତେବେ, ଉଭୟ ନେତା ବେଶ୍ କିଛି ସମୟ ଧରି ଗୋପନ ଆଲୋଚନା କରିଥିବା ବେଳେ ଏହାର ନିଷ୍କର୍ଷ ଜଣାପଡିନଥିଲେ ହେଁ ଏହା ରାଜନୈତିକ ବାତାବରଣକୁ ସରଗରମ କରି ଦେଇଛି ।
ସୂଚନାଯୋଗ୍ୟ ଯେ, ଗତ ୨୦୧୪ରେ ରାସେଶ୍ୱରୀ ପ୍ରଥମ କରି ରାଜନୀତିକୁ ଆସି ବିଜେଡି ଟିକଟରେ ଭେଟେରାନ୍ ଜୟନାରାୟଣଙ୍କୁ ପରାସ୍ତ କରି ବିଧାୟିକା ହୋଇଥିଲେ । ହେଲେ ୨୦୧୯ରେ ରାସେଶ୍ୱରୀ ତାଙ୍କ ପାରମ୍ପାରିକ ପ୍ରତିଦ୍ୱନ୍ଦ୍ୱୀ ଜୟନାରାୟଣଙ୍କ ଠାରୁ ପରାସ୍ତ ହୋଇଥିଲେ ।