ଭୁବନେଶ୍ଵର, ୦୯/୦୫ : ଗୃହିଣୀମାନେ ଘରର ଜିନିଷକୁ ସାଇତି ରଖିବା ପାଇଁ ବିଭିନ୍ନ ଜିନିଷର ସହାୟତା ନେଇଥାନ୍ତି । ଏମିତି ଅନେକ ଜିନିଷ ବ୍ୟବହାର କରିଥାଉ, ଯାହା ସମସ୍ତଙ୍କ ପାଇଁ କ୍ଷତିକାରକ । ବିଭିନ୍ନ ଘରୋଇ ଜିନିଷକୁ ସାଇତି ରଖିବା ପାଇଁ ଏହାର ବ୍ୟବହାର କରାଯାଇଥାଏ । କିନ୍ତୁ କର୍କଟ ପରି ରୋଗ ମଧ୍ୟ ସୃଷ୍ଟି କରିପାରେ । ଏସବୁ ଜିନିଷରୁ ବାହାରୁଥିବା ରାସାୟନିକ ପଦାର୍ଥ କର୍କଟ ରୋଗର କାରଣ ସାଜିଥାଏ । ତେବେ ଚାଲନ୍ତୁ ଜାଣିବା ଘରେ ବ୍ୟବହୃତ କେଉଁ ଜିନିଷ ଜୀବନ ପାଇଁ କ୍ଷତିକାରକ ।
ନନ୍ଷ୍ଟିକ୍ କୁକ୍ୱେର୍
ଆଜିକାଲି ପ୍ରାୟ ସମସ୍ତେ ଘରେ ନନ୍ଷ୍ଟିକ୍ କୁକୱେର୍ ବ୍ୟବହାର କରୁଛନ୍ତି । ଏଥିରେ ରୋଷେଇ କରିବା ଓ ସଫା କରିବା ଖୁବ୍ ସହଜ । ତେଣୁ ମହିଳାମାନେ ଏଥିରେ ରୋଷେଇ କରିବାକୁ ପସନ୍ଦ କରିଥାନ୍ତି । କିନ୍ତୁ ଏହା ଶରୀର ଉପରେ ଖୁବ୍ ନକାରାତ୍ମକ ପ୍ରଭାବ ପକାଇଥାଏ । ଏହି ବାସନ ଗରମ ହେବା ସହ ଏଥିରୁ ହାନିକାରକ କେମିକାଲ କ୍ଷରଣ ହୋଇଥାଏ, ଯାହା କର୍କଟର କାରଣ ସାଜିଥାଏ ।
ଗନ୍ଧକର୍ପୂର
ସାଇତି ରଖୁଥିବା ପୋଷାକପତ୍ରକୁ ସୁରକ୍ଷିତ ରଖିବା ପାଇଁ ଆମେ ଗନ୍ଧକର୍ପୂର ବ୍ୟବହାର କରିଥାଉ । ଏହାକୁ ବ୍ୟାଗ୍ ଓ ଆଲମିରା ଭିତରେ ମଧ୍ୟ ରଖିଥାଉ । ଏହା ଛୋଟ ଛୋଟ କୀଟମାନଙ୍କଠାରୁ ପୋଷାକକୁ ଦୂରେଇ ରଖିଥାଏ । ଏହା ପୋଷକପତ୍ର ପାଇଁ ଲାଭଦାୟକ, କିନ୍ତୁ ଏଥିରୁ ବାହାରୁଥିବା ବିଷାକ୍ତ ଗନ୍ଧ ଶ୍ୱାସନଳୀରେ ସମସ୍ୟା ସୃଷ୍ଟି କରିଥାଏ । ଏହା ପରୋକ୍ଷରେ ମୁଣ୍ଡବିନ୍ଧା ଓ ନର୍ଭସ୍ ସିଷ୍ଟମ୍ କ୍ଷତିର କାରଣ ସାଜିଥାଏ ।
ପ୍ଲାଷ୍ଟିକ୍ ଡବା
ଏହା ପ୍ରାୟ ସମସ୍ତଙ୍କ ଘରେ ବହୁ ମାତ୍ରାରେ ରହିଥାଏ । ପ୍ଲାଷ୍ଟିକ ଡବା ଶସ୍ତା ସାଙ୍ଗକୁ ମଜଭୁତ ହୋଇଥିବାରୁ ଗୃହିଣୀମାନେ ଜିନିଷପତ୍ର ରଖିବା ପାଇଁ ଏହାର ବ୍ୟବହାରକୁ ପସନ୍ଦ କରିଥାନ୍ତି । ଏହି ଡବାରେ ମଧ୍ୟ ହାନିକାରକ ରାସାୟନିକ ରହିଥାଏ, ଯାହା କର୍କଟ ରୋଗ ସୃଷ୍ଟି କରିଥାଏ ।
ରୁମ୍ ଫ୍ରେସନର୍
ସମସ୍ତେ ଚାହାନ୍ତି ଘରକୁ ସୁଗନ୍ଧିତ ମହକରେ ଭରିଦେବାକୁ । ସେଥିପାଇଁ କିଛି କିଛି ମହିଳା ଘରକୁ ମହକିତ କରିବା ପାଇଁ ରୁମ୍ ଫ୍ରେସନର୍ର ବ୍ୟବହାର କରିଥାନ୍ତି । ରୁମ୍ ଫ୍ରେସନର୍ରୁ ବାହାରୁଥିବା ଭୋଲେଟାଇଲ୍ ଅର୍ଗାନିକ୍ କମ୍ପାଉଣ୍ଡସ୍, ଶ୍ୱାସପ୍ରଶ୍ୱାସ ପ୍ରଣାଳୀକୁ କ୍ଷତି ପହଞ୍ଚାଏ । ଏହାର ଗନ୍ଧ ମୁଣ୍ଡବିନ୍ଧା ଓ ନର୍ଭସ୍ ସିଷ୍ଟମ କ୍ଷତିଗ୍ରସ୍ତ ହୋଇଥାଏ ।
ଘରସଫା ପାଇଁ କ୍ଲିନର୍
ଘରକୁ ସଫାକରିବା ପାଇଁ ଆମେ ଅନେକ ପ୍ରକାରର କେମିକାଲ୍ଯୁକ୍ତ ଉତ୍ପାଦ ବ୍ୟବହାର କରିଥାଉ । ଏହାର ବ୍ୟବହାର ଦ୍ୱାରା ଘର ତ ନିଶ୍ଚୟ ସଫା ହୋଇଥାଏ । କିନ୍ତୁ ଏହାଦ୍ୱାରା ଶ୍ୱାସନଳୀ ସମ୍ବନ୍ଧୀୟ ସମସ୍ୟା, ଆଣ୍ଟି-ବାୟୋଟିକ୍ ରେଜିଷ୍ଟାନ୍ସ ତ୍ୱଚା ଓ ଆଖି କୁଣ୍ଡାଇହେବା ପରି ସମସ୍ୟା ଦେଖା ଦେଇଥାଏ ।