ଭୁବନେଶ୍ୱର,୦୯/୦୫: ଓଡ଼ିଆ ସିନେମା ପାଇଁ ଖୁସିର ବିଷୟ । କାନ୍ସୱାର୍ଲ୍ଡ ଫିଲ୍ମ ଫେଷ୍ଟିଭାଲ୍-୨୦୨୪ରେ ପ୍ରଦର୍ଶିତ ହେବା ପାଇଁ ମନୋନୀତ ହୋଇଛି ଓଡ଼ିଆ ଚଳଚ୍ଚିତ୍ର "ଡେଲିଭରୀ ବୟ' । ଏ ନେଇ ପୂରା ୟୁନିଟ୍ ଖୁସି ବ୍ୟକ୍ତ କରିଥିବାବେଳେ ସାରା ଓଡ଼ିଶା ଏବଂ ଓଡ଼ିଆ ସିନେମା ଜଗତରୁ ଶୁଭେଚ୍ଛାର ସୁଅ ଛୁଟିଛି ।
ସିନେମାର ନିର୍ଦ୍ଦେଶକ ତଥା ଯୁବ ପ୍ରତିଭା ସମ୍ପନ୍ନ କଳାକାର ଅଶ୍ୱିନୀ ତ୍ରିପାଠୀ କହିଛନ୍ତି, ‘ଓଡ଼ିଶା ଦର୍ଶକଙ୍କ ଭଲପାଇବା ଏବଂ ଆଶୀର୍ବାଦ ପାଇଁ ଏହି ସୁଯୋଗ ମିଳିଛି । ପୂରା ଟିମ୍ର ଶ୍ରମ ସାର୍ଥକ ହୋଇଛି । ସମସ୍ତଙ୍କ ଅକୁଣ୍ଠ ସମର୍ଥନ ଆମକୁ ସଫଳତାର ଶୀର୍ଷ ଛୁଇଁବାକୁ ସୁଯୋଗ ଦେଇଛି । ସେଥିପାଇଁ ଆମେ କୃତଜ୍ଞ’ । ଶ୍ରୀ ତ୍ରିପାଠୀ କହିଛନ୍ତି, ଆଇଏମ୍ଡିବିର ରେଟିଂ ଭଲ ଥିବା ସିନେମା ଏହି ଫେଷ୍ଟିଭାଲ୍ ଲାଗି ଆବେଦନ କରିପାରିବେ । ସେହି ହିସାବରେ ୪ ମାସ ତଳୁ "ଡେଲିଭରୀ ବୟ' ପାଇଁ ଆବେଦନ ହୋଇଥିଲା, ଯାହା ମନୋନୀତ ହୋଇଛି । ସର୍ବଭାରତୀୟ ସ୍ତରରେ ଶହେ ସିନେମା ମନୋନୀତ ହୋଇଥିବାବେଳେ ଏକମାତ୍ର ଓଡ଼ିଆ ସିନେମା ଭାବେ "ଡେଲିଭରୀ ବୟ' ସ୍ଥାନ ପାଇଛି ଯାହା ଆମ ପାଇଁ ଗର୍ବର ବିଷୟ । ଏହା ଆମ ପାଇଁ ବହୁତ ବଡ଼ ସୁଯୋଗ ଆଣିଛି । ଆସନ୍ତା ଅଗଷ୍ଟରେ ଏହା ସ୍କ୍ରିନିଂ ହେବ ବୋଲି ଶ୍ରୀ ତ୍ରିପାଠୀ କହିଛନ୍ତି ।
ଗତବର୍ଷ ଏପ୍ରିଲ୍ ୭ ତାରିଖରେ ସାରା ଓଡ଼ିଶାରେ ମୁକ୍ତିଲାଭ କରିଥିଲା "ଡେଲିଭରୀ ବୟ' । ପରେ ଏହା ବେଙ୍ଗାଲୁରୁ, ଚେନ୍ନାଇ, ହାଇଦ୍ରାବାଦ ଓ ନୂଆଦିଲ୍ଲୀର ବିଭିନ୍ନ ପ୍ରେକ୍ଷାଳୟରେ ମୁକ୍ତିଲାଭ କରିଥିଲା । ଦୀର୍ଘ ୪୦ ଦିନ ଧରି ପ୍ରେକ୍ଷାଳୟରେ ସଗୌରବେ ଚାଲି ଏହା ଦର୍ଶକଙ୍କ ମନ ଜିଣିଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନୁମୋଦନ ପରେ ରାଜ୍ୟ ସରକାର ଏହି ଚଳଚ୍ଚିତ୍ର ଉପରୁ ପ୍ରମୋଦ କର ଛାଡ଼ କରିଥିଲେ । ପ୍ରିମିୟର ପାଇଁ ପୂର୍ବତନ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କୁ ନିମନ୍ତ୍ରଣ କରାଯାଇଥିବାବେଳେ ସେ ଟ୍ରେଲର୍ ଦେଖି ସୁନ୍ଦର ସାମାଜିକ ବାର୍ତ୍ତା ପ୍ରଦାନ କରୁଥିବା ଏହି ଚଳଚ୍ଚିତ୍ରର ଉଚ୍ଚ ପ୍ରଶଂସା କରିବା ସହ ଶୁଭେଚ୍ଛା ଜଣାଇଥିଲେ ।
ଇନ୍ଫିସନ୍ ଏଣ୍ଟରଟେନ୍ମେଣ୍ଟ ନିବେଦିତ ଜ୍ୟୋତି ରଞ୍ଜନ ମହାନ୍ତି ପ୍ରଯୋଜିତ ଓ ଅଶ୍ୱିନୀ ତ୍ରିପାଠୀ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ମୌଳିକ ଓ ବାସ୍ତବଧର୍ମୀ ଜଣେ ‘ଡେଲଭରୀ ବୟ’ର ଜୀବନ କାହାଣୀ ଉପରେ ଆଧାରିତ । ଏଥିରେ ସଡ଼କ ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରାଯାଇଥିଲା । ଏଥିରେ ଅନେକ ଲୋକପ୍ରିୟ କଳାକାର ବୁଦ୍ଧାଦିତ୍ୟ, ଶୈଳେନ୍ଦ୍ର, ସୂର୍ଯ୍ୟମୟୀ, ପ୍ରିୟମ୍ବଦାଙ୍କ ସହ ଶକ୍ତି ବରାଳ, ଜୀବନ ପଣ୍ଡା, ଇଲୁ ବାନାର୍ଜୀ, ସରୋଜ ଦାଶ, ଚୌଧୁରୀ ବିକାଶ ଦାସ, ସୁଶାନ୍ତ, ସନ୍ତୁ, ଅମନ୍, ଗୁଡ୍ଡୁ ଓ ପୁପୁଲ ଅଭିନୟ କରିଛନ୍ତି । କାହାଣୀ ପରିକଳ୍ପନା ପ୍ରଯୋଜକ ଜ୍ୟୋତି କରିଥିବାବେଳେ ସଂଳାପ ଲେଖିଥିଲେ ଦୀପକ ଜେନା । ଚିତ୍ରନାଟ୍ୟ ପ୍ରସ୍ତୁତି ସହ ନିର୍ଦ୍ଦେଶନା ଦେଇଥିଲେ ଅଶ୍ୱିନୀ । ଡା. ନିର୍ମଳ ନାୟକଙ୍କ ଗୀତକୁ ସଙ୍ଗୀତରେ ସଜାଇଥିଲେ ବୈଦ୍ୟନାଥ ଦାଶ । ଗୀତଗୁଡ଼ିକୁ ବଲିଉଡ ପ୍ରସିଦ୍ଧ କଣ୍ଠଶିଳ୍ପୀ ଉଦିତ ନାରାୟଣଙ୍କ ସହ ଓଡ଼ିଶାର ହ୍ୟୁମାନ ସାଗର, ଅସୀମା ପଣ୍ଡା ଓ ଋତୁରାଜ ମହାନ୍ତି ଗାଇଥିଲେ । ବିଭିନ୍ନ ଦୃଷ୍ଟିରୁ ସିନେମାଟି ବଳିଷ୍ଠ ହୋଇଥିବାରୁ ଦର୍ଶକଙ୍କୁ ପସନ୍ଦ ଆସିଥିଲା ।