- ୩୭ରୁ ୧୭ ପ୍ରାର୍ଥୀ କୋଟିପତି
- ରୋଜଗାରରେ ଏକ ନମ୍ବର ବଳଭଦ୍ର ମାଝୀ
- ସର୍ବାଧିକ ଋଣ ପ୍ରଦୀପ ପାଣିଗ୍ରାହୀଙ୍କ ମୁଣ୍ଡରେ
ଭୁବନେଶ୍ୱର,୦୫/୦୫: କଳାହାଣ୍ଡି ସଂସଦୀୟ କ୍ଷେତ୍ରରୁ ଲଢ଼ୁଥିବା ବିଜେପି ପ୍ରାର୍ଥୀ ରାଣୀ ମାଳବିକା ଦେବୀ ୪୧ କୋଟି ୮୯ ଲକ୍ଷ ଟଙ୍କା ସମ୍ପତ୍ତିର ମାଲିକ । ଏଥିରୁ ଅସ୍ଥାବର ସମ୍ପତ୍ତି ୧ କୋଟି ୫୯ ଲକ୍ଷ ଟଙ୍କା । ବାକି ୪୦ କୋଟି ୩୦ ଲକ୍ଷ ସ୍ଥାବର ।
ପ୍ରଥମ ପର୍ଯ୍ୟାୟ ଭୋଟରେ ୪ଟି ଲୋକସଭା କ୍ଷେତ୍ର କଳାହାଣ୍ଡି, କୋରାପୁଟ, ନବରଙ୍ଗପୁର ଓ ବ୍ରହ୍ମପୁରରୁ ଲଢ଼ୁଥିବା ୩୭ ଜଣ ପ୍ରାର୍ଥୀଙ୍କ ମଧ୍ୟରେ ମାଳବିକା ସବୁଠାରୁ ଧନୀ । ସବୁଠାରୁ ଗରିବ ହେଲେ କୋରାପୁଟ ଲୋକସଭା ଆସନରୁ ଲଢ଼ୁଥିବା ପ୍ରମିଳା ପୂଜାରୀ । ଏସୟୁସିଆଇ (ସି) ଦଳର ପ୍ରାର୍ଥୀ ପ୍ରମିଳାଙ୍କ ପାଖରେ ମାତ୍ର ୨୦ ହଜାର ୬୨୫ ଟଙ୍କା ଅସ୍ଥାବର ସମ୍ପତ୍ତି ଅଛି । ଘର ବାଡ଼ି, ଜମି ଭଳି ସ୍ଥାବର ସମ୍ପତ୍ତି ଟଙ୍କାଏ ମୂଲ୍ୟର ବି ନାହିଁ ।
ପ୍ରାର୍ଥୀମାନେ ଦାଖଲ କରିଥିବା ସତ୍ୟପାଠକୁ ଅନୁଶୀଳନ କରି ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମ (ଏଡିଆର୍) ଏ ତଥ୍ୟ ପ୍ରକାଶ କରିଛି । ଏହି ରିପୋର୍ଟ କହୁଛି, ଧନି ପ୍ରାର୍ଥୀ ତାଲିକାରେ ୨ ନମ୍ବରରେ ଅଛନ୍ତି ବ୍ରହ୍ମପୁରର ସ୍ୱାଧୀନ ପ୍ରାର୍ଥୀ ଭି. ଚନ୍ଦ୍ରଶେଖର । ଚନ୍ଦ୍ରଶେଖରଙ୍କ ମୋଟ୍ ସମ୍ପତ୍ତିର ମୂଲ୍ୟ ୨୮ କୋଟି ୭୦ଲକ୍ଷ ଟଙ୍କା ।
ତୃତୀୟ ସ୍ଥାନରେ ଅଛନ୍ତି ବ୍ରହ୍ମପୁରରୁ ଭାରତୀୟ ବିକାଶ ପରିଷଦ ସାଂସଦ ପ୍ରାର୍ଥୀ ହୋଇଥିବା ରାଜେନ୍ଦ୍ର ଦଳବେହେରା । ତାଙ୍କର ମୋଟ ସମ୍ପତ୍ତିର ମୂଲ୍ୟ ୧୦ କୋଟିରୁ ଅଧିକ । ହେଲେ ୩୭ ପ୍ରାର୍ଥୀଙ୍କ ମଧ୍ୟରେ ସବୁଠାରୁ ଅଧିକ ଆୟ ନବରଙ୍ଗପୁର ବିଜେପି ପ୍ରାର୍ଥୀ ବଳଭଦ୍ର ମାଝୀଙ୍କର । ୨୦୨୨-୨୩ ବର୍ଷରେ ତାଙ୍କର ରୋଜଗାର (ପତ୍ନୀଙ୍କ ଆୟ ସହ) ୬୬ ଲକ୍ଷ ୨୫ ହଜାର ଟଙ୍କା । ପେନ୍ସନ, ଚାଷ ଓ ବ୍ୟବସାୟରୁ ଏତିକି ଆୟ ହୋଇଥିବା ସେ ଆୟକର ରିଟର୍ଣ୍ଣରେ ଦର୍ଶାଇଛନ୍ତି । ବଳଭଦ୍ରଙ୍କ ମୋଟ ସମ୍ପତ୍ତିର ମୂଲ୍ୟ ୭ କୋଟି ୮୮ ଲକ୍ଷ ଟଙ୍କା।
ବ୍ରହ୍ମପୁର ବିଜେଡି ପ୍ରାର୍ଥୀ ଭୃଗୁ ବକ୍ସିପାତ୍ର ଏବଂ ତାଙ୍କ ପତ୍ନୀଙ୍କ ରୋଜଗାର ୧୯ ଲକ୍ଷ ୨୬ ହଜାର ଟଙ୍କା ଥିଲା ୨୦୨୨-୨୩ରେ । ୭ ଲକ୍ଷ ୭୦ ହଜାର ଟଙ୍କା ଆୟକର ଦେଇଥିଲେ ସେ । ଅଧିକ ରୋଜଗାର ତାଲିକାରେ ଭୃଗୁ ୩ ନମ୍ବରରେ । ଧନି ତାଲିକାରେ କିନ୍ତୁ ସେ ୬ଷ୍ଠ ସ୍ଥାନରେ । ତାଙ୍କ ସମ୍ପତ୍ତି ମୂଲ୍ୟ ୫ କୋଟି ୨୫ ହଜାର ଟଙ୍କା ବୋଲି ସେ ଦର୍ଶାଇଛନ୍ତି । ଭୃଗୁଙ୍କ ମୁଣ୍ଡରେ ୫ କୋଟି ୨୫ ଲକ୍ଷ ଟଙ୍କାର ଋଣ ବୋଝ ବି ରହିଛି ।
ଏଡିଆର୍ ରିପୋର୍ଟ ଅନୁସାରେ ସବୁଠାରୁ ଅଧିକ ଋଣ ବୋଝ ମୁଣ୍ଡାଇଛନ୍ତି ବ୍ରହ୍ମପୁର ବିଜେପି ଲୋକସଭା ପ୍ରାର୍ଥୀ ପ୍ରଦୀପ ପାଣିଗ୍ରାହୀ । ୩ କୋଟି ୮୨ ଲକ୍ଷ ଟଙ୍କାର ଋଣ ବୋଝ ତାଙ୍କ ମୁଣ୍ଡରେ । ପ୍ରଦୀପଙ୍କର ମୋଟ ସମ୍ପତ୍ତିର ମୂଲ୍ୟ ୩ କୋଟି ୭୮ ଲକ୍ଷ ଟଙ୍କା । ସମ୍ପତ୍ତିଠୁ ଅଧିକ ଋଣ ।
ପ୍ରଥମ ପର୍ଯ୍ୟାୟର ୩୭ ଜଣ ଲୋକସଭା ପ୍ରାର୍ଥୀଙ୍କ ମଧ୍ୟରୁ ୧୭ ଜଣ କୋଟିପତି । ବିଜେଡିର ୪ ପ୍ରାର୍ଥୀ କୋଟିପତି । ବିଜେପିର ୪, କଂଗ୍ରେସର ୩ ଓ ୬ ଜଣ ସ୍ୱାଧୀନ କିମ୍ବା ଅନ୍ୟ ଦଳର । ନବ ଭାରତ ନିର୍ମାଣ ସେବା ପାର୍ଟିର ୨ ଜଣ ପ୍ରାର୍ଥୀଙ୍କ ମଧ୍ୟରୁ ଜଣେ କୋଟିପତି ହୋଇଥିବାବେଳେ ଭାରତୀୟ ବିକାଶ ପରିଷଦର ଏକମାତ୍ର ପ୍ରାର୍ଥୀ ଜଣଙ୍କ ମଧ୍ୟ କୋଟିପତି ତାଲିକାରେ ରହିଛନ୍ତି ।