ସୁକିନ୍ଦା,୨୧/୦୫ (ରବିନ୍ଦ୍ର ସାମଲ): ବହୁ ଚର୍ଚ୍ଚିତ ଯାଜପୁର ଜିଲ୍ଲା ନଗଡ଼ାର ଜୁଆଙ୍ଗ ଭୋଟ୍ ଦେବା ପାଇଁ ୧୧ କିମି ଦୂରରେ ଥିବା ଦେଓଗାଁ ବୁଥ୍କୁ ଯିବେ । ସୁକିନ୍ଦା ନିର୍ବାଚନମଣ୍ଡଳୀର ମୋଟ୍ ୨୨୫ଟି ବୁଥ୍ରୁ ଦେଓଗାଁ ବୁଥ୍ ହେଉଛି ୧ ନମ୍ବର ବୁଥ୍ । ସୁକିନ୍ଦା ବ୍ଲକର ଚୁଙ୍ଗୁଡ଼ିପାଳ ପଞ୍ଚାୟତ ଅନ୍ତର୍ଗତ ଦେଓଗାଁ, ଗୁହିଆଶାଳ, ତୁମୁଣି ଓ ନଗଡ଼ା ଗ୍ରାମର ମୋଟ ୮୧୪ ଭୋଟରଙ୍କୁ ନେଇ ଏହି ବୁଥ୍ ଗଠିତ । ଏହି ବୁଥ୍ରେ ନଗଡ଼ାର ତିନୋଟି ଗାଁ (ତଳ ନଗଡ଼ା, ମଝି ନଗଡ଼ା ଓ ଉପର ନଗଡ଼ା) ଲୋକ ମାନେ ୧୧ କିଲୋମିଟର ରାସ୍ତା ଅତିକ୍ରମ କରି ଦେଓଗାଁ ବୁଥ୍ରେ ଭୋଟ ପ୍ରଦାନ କରିବେ । ନଗଡ଼ାରୁ ଏବେ ଖଣି ଅଞ୍ଚଳ ପର୍ଯ୍ୟନ୍ତ ଗ୍ରାମ ଉନ୍ନୟନ ବିଭାଗ ଦ୍ୱାରା ସବୁ ଦିନିଆ ରାସ୍ତା ହୋଇ ସାରିଛି । ମାତ୍ର ତୁମୁଣି ଗ୍ରାମର ଭୋଟରମାନେ ୩ କିଲୋମିଟର ଓ ଗୁହିଆଶାଳର ଭୋଟରମାନେ ୪ କିଲୋମିଟର ପାହାଡ଼ି ରାସ୍ତା ଅତିକ୍ରମ କରି ନାଲିଆଡ଼ାବରେ ପହଞ୍ଚିବେ । ସେଠାରୁ ୭ କିମି ସବୁ ଦିନିଆ ରାସ୍ତା ଦେଇ ଦେଓଗାଁ ବୁଥ୍ରେ ପହଞ୍ଚିବେ ।
ପୂର୍ବରୁ ନଗଡ଼ାକୁ ବାଟ ଫିଟିନଥିଲା । ଏଠିକାର ଭୋଟରମାନେ ପାହାଡ଼ି ରାସ୍ତାରେ ଚାଲି ଚାଲି ଭୋଟ୍ ଦେବାକୁ ଆସୁଥିଲେ । ସେଥିପାଇଁ କାଁ ଭାଁ କେତେଜଣଙ୍କୁ ଛାଡ଼ି ଦେଲେ ଅନ୍ୟମାନେ ଭୋଟ୍ ଦେଉନଥିଲେ । ଯେଉଁମାନେ ଭୋଟ୍ ଦେବାକୁ ଚାହୁଁଥିଲେ, ସେମାନେ ପୂର୍ବଦିନ ଦେଓଗାଁ ସ୍କୁଲରେ ଆସି ରାତ୍ରୀ ଯାପନ କରୁଥିଲେ । ପର ଦିନ ଭୋଟ ଦେଇ ଚାଲି ଚାଲି ଘରକୁ ଫେରୁଥିଲେ । ବହୁ ଚର୍ଚ୍ଚିତ ଅପପୁଷ୍ଟି ମୃତ୍ୟୁ ଘଟଣା ପରେ ନଗଡ଼ାକୁ ବାଟ ଫିଟିଛି । ମାତ୍ର ନାଲିଆଡାବ ଠାରୁ ତୁମୁଣି ଓ ଗୁହିଆଶାଳ ଯାଏ ଏବେ ବି ପାହାଡ଼ି ରାସ୍ତାରେ ଜୁଆଙ୍ଗମାନେ ଯିବା ଆସିବା କରୁଛନ୍ତି । ଗୁହିଆଶାଳରେ ୨୬ଟି ପରିବାର ବାସ କରୁଥିବା ବେଳେ ତୁମୁଣିରେ ୨୫ ପରିବାର, ମଝି ନଗଡ଼ା ଓ ଉପର ନଗଡ଼ା ମିଶାଇ ୩୨ ପରିବାର ଏବଂ ତଳନଗଡ଼ା ୩୭ ଜୁଆଙ୍ଗ ପରିବାର ବସବାସ କରୁଛନ୍ତି । ନଗଡ଼ାର ଭୋଟର ମାନେ ୨୦୧୯ ନିର୍ବାଚନରେ ପ୍ରଥମଥର ପାଇଁ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ନିର୍ମିତ ରାସ୍ତାରେ ଦେଓଗାଁ ବୁଥ୍କୁ ଆସି ଭୋଟ ଦେଇଥିଲେ ।
୨୦୧୯ ଭୋଟର ତାଲିକା ଅନୁଯାୟୀ ଏହି ବୁଥ୍ରେ ମୋଟ୍ ୮୧୮ ଭୋଟର ଥିଲେ । ତନ୍ମଧ୍ୟରୁ ୬୧୪ ଭୋଟର ମତ ସାବ୍ୟସ୍ତ କରିଥିଲେ। ତଳ ଓ ମଝି ନଗଡ଼ାର ଗାଁ ମୁଖିଆ ଭଦୁଆ ପ୍ରଧାନ, ପବିତ୍ର ପ୍ରଧାନ, କୃପା ପ୍ରଧାନ, ମଝି ନଗଡ଼ାର ଭାଲୁ ପ୍ରଧାନ, ସୁନା ପ୍ରଧାନ ଓ ଉପର ନଗଡ଼ାର ମଣିଆ ପ୍ରଧାନ ମୁଖ୍ୟ, ପଟଙ୍ଗ ପ୍ରଧାନଙ୍କ ସୂଚନା ମୁତାବକ, ନଗଡ଼ା ଶିଶୁ ମଡ଼କ ପରେ ଯଦିଓ ନଗଡ଼ାରେ ରାସ୍ତା ଘାଟ, ଘରଦ୍ୱାର ନିର୍ମାଣ ହୋଇସାରିଛି ମାତ୍ର ଦୈନନ୍ଦିନ ଗୁଜୁରାଣ ମେଣ୍ଟାଇବା ପାଇଁ କୌଣସି ବ୍ୟବସ୍ଥା ହୋଇ ପାରିଲା ନାହିଁ । ତେଣୁ ଚଳିତ ନିର୍ବାଚନରେ ଜୁଆଙ୍ଗମାନେ ଭୋଟ ଦେବାକୁ ଏତେ ମାତ୍ରାରେ ମଙ୍ଗୁ ନାହାନ୍ତି ।
କଳିଙ୍ଗନଗର ଅତିରିକ୍ତ ଜିଲ୍ଲାପାଳ ଲଙ୍କେଶ୍ୱର ଅମାତ, ସୁକିନ୍ଦା ବିଡିଓ ଅଭିଷେକ ସ୍ୱାଇଁ ଓ ବ୍ଲକ ଶିକ୍ଷା ଅଧିକାରୀ ନାରାୟଣ ଦାସ ବିଭିନ୍ନ ସମୟରେ ଏହି ଗ୍ରାମଗୁଡ଼ିକ ଯାଇ ଜୁଆଙ୍ଗମାନଙ୍କୁ ଭୋଟ୍ ଦେବାକୁ ସଚେତନ କରାଇଛନ୍ତି । ତଥାପି ଚଳିତ ଥର ମତଦାନ ହାର ଗତଥର ଠାରୁ କମିପାରେ ବୋଲି ଏହି ଗ୍ରାମବାସୀମାନେ ‘ପ୍ରମେୟ’କୁ କହିଛନ୍ତି । ସେମାନଙ୍କ ରୋଜଗାର ପାଇଁ ବ୍ୟବସ୍ଥା କରିବାକୁ ସେମାନେ ଦାବି କରିଛନ୍ତି ।
ଏ ସମ୍ପର୍କରେ ସୁକିନ୍ଦା ବିଡିଓ ଶ୍ରୀ ସ୍ୱାଇଁ କହିଛନ୍ତି, ନିକଟରେ କୌଣସି ବୁଥ୍ର ବ୍ୟବସ୍ଥା ଏଯାବତ୍ ହୋଇପାରିନଥିବାରୁ ଏହି ୫ଟି ଗ୍ରାମର ଭୋଟରମାନେ ଦେଓଗାଁରେ ହିଁ ଭୋଟ୍ ଦେବେ । ଚଳିତ ନିର୍ବାଚନରେ ପ୍ରଶାସନ ପକ୍ଷରୁ ନଗଡ଼ାରୁ ଲକ୍ଷ୍ମୀ ବସ୍ ଯୋଗେ ସେଠିକାର ଭୋଟର ମାନଙ୍କୁ ଦେଓଗାଁ ବୁଥ୍ ପର୍ଯ୍ୟନ୍ତ ଅଣାଯିବାର ବ୍ୟବସ୍ଥା କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।