ଫିରିଙ୍ଗିଆ, ୨୭।୪: କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅଞ୍ଚଳରୁ କିଛିଦିନ ହେଲା ରୀତିମତ ଭାବେ ଗଞ୍ଜେଇ ଚୋରା ଚାଲାଣ ଚାଲିଥିବା ବେଳେ ଏହି ଗଞ୍ଜେଇ କାରବାର ଦିନକ ଦିନ ବଢ଼ିବାରେ ଲାଗିଛି I ସେପଟେ ଏହି ଗଞ୍ଜେଇ କାରବାର ଉପରେ ପୋଲିସର କଡ଼ା ସୁରକ୍ଷା ବ୍ୟବସ୍ଥା ରହିଥିଲେ ମଧ୍ୟ ପୋଲିସକୁ ଚକମା ଦେଇ ବାହାର ରାଜ୍ୟ ଓ ଆନ୍ତଜିଲ୍ଲା ଗଞ୍ଜେଇ ମାଫିଆମାନେ ଅଞ୍ଚଳର କିଛି  ଯୁବକ ଯୁବତୀମାନଙ୍କ ସହାୟତାରେ ଗଞ୍ଜେଇ ଚାଲାଣ କରିଚାଲିଛନ୍ତି I ସେପଟେ କିଛିଦିନ ହେଲା ଫିରିଙ୍ଗିଆ ବ୍ଲକ ଅଞ୍ଚଳରୁ ଗଞ୍ଜେଇ କାରବାରକୁ ସମୂଳେ ବିନାଶ କରିବା ପାଇଁ ପୋଲିସ ମଧ୍ୟ ଅଣ୍ଟା ଭିଡ଼ିଛି I ଲଗାତାର ଭାବରେ ପୋଲିସ ଅଞ୍ଚଳର ବିଭିନ୍ନ ଜାଗାରେ ଚଢ଼ାଉ କରି କୁଇଣ୍ଟାଲ କୁଇଣ୍ଟାଲ ଗଞ୍ଜେଇ ଜବତ କରି କୋର୍ଟ ଚାଲାଣ କରିଚାଲିଥିବା ବେଳେ ଅନୁରୂପ ଭାବରେ ପୁଣି ଥରେ ଫିରିଙ୍ଗିଆ ପୋଲିସକୁ ମିଳିଛି ଏକ ବଡ଼ ସଫଳତା I 

ତେବେ ପୋଲିସର ସୂଚନା ଅନୁସାରେ, ଗୋଟିଏ ଦିନରେ ଦୁଇଟି ପୃଥକ ଜାଗାରେ ଚଢ଼ାଉ କରି ସମୁଦାୟ ୧୦ କ୍ୱିଣ୍ଟାଲ ୮୦ କିଲୋ ଗଞ୍ଜେଇ ଜବତ କରିବାରେ ସକ୍ଷମ ହୋଇଛି । କିନ୍ତୁ, ଦୁର୍ଭାଗ୍ୟବଶତଃ ଏଥର ମଧ୍ୟ ଗଞ୍ଜେଇ ବ୍ୟବସାୟୀ ଧରାପଡ଼ିନଥିବା ପୋଲିସ ସୂଚନା ଦେଇଛି I ତେବେ କୌଣସି ସୂତ୍ରରୁ ଖବର ପାଇ ଫିରିଙ୍ଗିଆ ଥାନା ଅଧିକାରୀଙ୍କ ନିର୍ଦ୍ଦେଶ କ୍ରମେ ଥାନାରେ କାର୍ଯ୍ୟରତ ଏସଆଇ ଅଜୟ କୁମାର ସାହୁଙ୍କ ନେତୃତ୍ୱରେ ଫିରିଙ୍ଗିଆ ଥାନା ସାଡ଼ୀଙ୍ଗିଆ ଗାଁ ପାଖ ଜଙ୍ଗଲରେ ଚାଲାଣ ପାଇଁ ପ୍ରସ୍ତୁତ କରି ରଖାଯାଇଥିବା ଏକ ହଜାର ୬୫ କିଲୋ ଗଞ୍ଜେଇ ଜବତ କରିଥିଲେ I ସେହିଭଳି ଏସଏଇ ପ୍ରମୋଦ କୁମାର ପ୍ରଧାନଙ୍କ ନେତୃତ୍ୱରେ ସେହି ସାଡ଼ୀଙ୍ଗିଆ ପଞ୍ଚାୟତ ବେଡ଼ାକେତା ଗାଁର ଜଣେ ବ୍ୟକ୍ତିଙ୍କ ଘରେ ଚଢ଼ାଉ କରାଯାଇ ସେହି ଘରୁ ପ୍ରାୟ ୧୫ କିଲୋ ଗଞ୍ଜେଇକୁ ଜବତ କରିଛି ପୋଲିସ I 

ଅନ୍ୟପଟେ ଏହି ଘଟଣାରେ ଫିରିଙ୍ଗିଆ ଥାନାରେ ଦୁଇଟି ପୃଥକ ମାମଲା ରୁଜୁ କରି ଜବତ ଗଞ୍ଜେଇକୁ ଶନିବାର କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ଗୋପୀନାଥ ପ୍ରଧାନ ସୂଚନା ଦେଇଛନ୍ତି I ଏହି ଚଢ଼ାଉରେ ଥାନାରେ କାର୍ଯ୍ୟରତ ଏସଏଇ ଦୀପକ କୁମାର ରାଉତ, ଏଏସଏଇ ଶ୍ରୀକାନ୍ତ ପାତ୍ର, ଏଏସଏଇ ପ୍ରମୋଦ କୁମାର ପ୍ରଧାନଙ୍କ ସହ ଅନ୍ୟକର୍ମଚାରୀମାନେ ମଧ୍ୟ ସାମିଲ ଥିବା ଘଟଣାର ତଦନ୍ତକାରୀ ପୋଲିସ ଅଧିକାରୀ ଅଜୟ କୁମାର ସାହୁ ସୂଚନା ଦେଇଛନ୍ତି I