ଚନ୍ଦ୍ରଶେଖରପୁର,୦୫/୦୫: ବଡ ଭଉଣୀଙ୍କୁ ଏକତରଫା ପ୍ରେମ କରୁଥିଲେ । ବାଟରେ ଘାଟରେ ହଇରାଣ କରୁଥିଲେ । ତେବେ ଏହାକୁ ବିରୋଧ କରି ଆସୁଥିଲେ ସାନ ଭଉଣୀ । ତେଣୁ ବିରୋଧ କରୁଥିବା ସାନ ଭଉଣୀଙ୍କୁ ରାସ୍ତାରୁ ହଟାଇବାକୁ ଯୋଜନା କଲେ । ମାରିଦେବାକୁ ଉଦ୍ୟମ କରି ପିକ୍ଅପ୍ ଭ୍ୟାନ ଗାଡି ନେଇ ସ୍କୁଟିରେ ଯାଉଥିବା ଭଉଣୀକୁ ଧକ୍କା ଦେଇ ୫୦୦ ମିଟର ଘୋଷାଡି ନେଇଗଲେ । ଏମିତି ଅଭାବନୀୟ ଘଟଣା ଇନଫୋସିଟି ଥାନା ଅଞ୍ଚଳରେ ଘଟିଛି । ଏହି ଘଟଣାରେ ଅଭିଯୁକ୍ତକୁ ଗିରଫ କରିଛି ଇନଫୋସିଟି ଥାନା ପୁଲିସ । ସେ ହେଲା ଅକ୍ଷୟ କୁମାର ବେହେରା (୪୪) । ଘର ମଞ୍ଚେଶ୍ୱର ଥାନା ଇଞ୍ଜଣା ମହାବୀର ବିହାରରେ । ପୁଲିସ ଦୁଇଟି ଗାଡିକୁ ଜବତ କରିଛି ।
ପୁଲିସ ସୂଚନା ଅନୁଯାୟୀ ଅମୀୟ କୁମାର ଜେନା ସପରିବାର ପଟିଆ ରେଳଷ୍ଟେସନ୍ ଅଞ୍ଚଳରେ ରହୁଛନ୍ତି । ଅକ୍ଷୟ ତାଙ୍କ ଘର ନିକଟରେ ଭଡାରେ ରହିବା ସହ ଏକ ପିକ୍ଅପ୍ ଭ୍ୟାନ୍ ଚଳାଇ ପରିବାର ପ୍ରତିପୋଷଣ କରୁଥିଲା । ଅମୀୟଙ୍କ ପତ୍ନୀ ବା ପୀଡ଼ିତାଙ୍କ ବଡ ଭଉଣୀଙ୍କୁ ଅକ୍ଷୟ ଏକତରଫା ପ୍ରେମ କରୁଥିଲା । ପୀଡିତାଙ୍କ ବଡ ଭଉଣୀ ବିବାହିତା ହୋଇଥିବା ହେତୁ ସେ ଅକ୍ଷୟଙ୍କ ଏହି ଭଲ ପାଇବାକୁ ପ୍ରତ୍ୟାଖ୍ୟାନ କରିଥିଲେ । ଏହି ଘଟଣାକୁ କେନ୍ଦ୍ର କରି ଉଭୟ ପରିବାର ମଧ୍ୟରେ ଶତ୍ରୁତା ଲାଗିରହିଥିଲା । ଏହାପରେ ଅକ୍ଷୟ ପୀଡ଼ିତାଙ୍କୁ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲା ।
ଗତକାଲି ସନ୍ଧ୍ୟାରେ ପୀଡ଼ିତା ପଟିଆ ସ୍ଥିତ କର୍ମସ୍ଥଳରୁ ସ୍କୁଟି ଯୋଗେ ଘରକୁ ଫେରିବା ବେଳେ ପଟିଆ-ସିପେଟ୍ ରାସ୍ତାରେ ଅକ୍ଷୟ ନିଜ ପିକ୍ଅପ୍ ଭ୍ୟାନ୍କୁ ଦ୍ରୁତଗତିରେ ଆଣି ସ୍କୁଟି ପଛପଟରେ ଖୁବ୍ ଜୋରରେ ଧକ୍କା ଦେଇଥିଲା । ପୀଡ଼ିତା ସ୍କୁଟି ସହ ତଳେ ପଡ଼ିଯିବା ପରେ ଅକ୍ଷୟ ତାଙ୍କୁ ନିଜ ଗାଡିରେ ୫୦୦ ମିଟର ପର୍ଯ୍ୟନ୍ତ ଘୋଷାଡି ନେଇଥିଲେ । ସ୍ଥାନୀୟ ଲୋକ ଏହା ଦେଖି ଅଭିଯୁକ୍ତର ଗାଡ଼ିକୁ ପିଛା କରି ତାକୁ ଅଟକାଇଥିଲେ । ପୀଡ଼ିତାଙ୍କୁ ଉଦ୍ଧାର କରି ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରିଥିଲେ । ଏହି ଘଟଣାରେ ପୀଡିତାଙ୍କ ଡାହାଣ ହାତ ଭାଙ୍ଗି ଯାଇଥିବା ବେଳେ ସ୍କୁଟିଟି ସମ୍ପୂର୍ଣ୍ଣ ଭାଙ୍ଗିରୁଜି ଯାଇଛି । ଏ ନେଇ ପୀଡିତାଙ୍କ ସ୍ୱାମୀ ଥାନାରେ ଅଭିଯୋଗ କରିଥିଲେ । ପୁଲିସ ଶନିବାର ଅକ୍ଷୟକୁ ଗିରଫ କରିବା ପରେ କୋର୍ଟଚାଲାଣ କରିଛି ।