ଭାପୁର,୨୩/୦୪: ହଟିଲାନି ସସ୍ପେନ୍ସ । ଖୋଲିଲାନି ପେଡ଼ି । ବିଜେଡିର ସପ୍ତମ ପର୍ଯ୍ୟାୟ ବିଧାନସଭା ପ୍ରାର୍ଥୀ ତାଲିକାରେ ବି ଝୁଲିରହିଲା ଖଣ୍ଡପଡ଼ା ଭାଗ୍ୟ । ଏଠାରୁ ଆଶାୟୀଙ୍କ ଅଭାବ ନାହିଁ । ତଥାପି ପ୍ରାର୍ଥୀ ଘୋଷଣାରେ ଏଭଳି ବିଳମ୍ବ ଦଳୀୟ ନେତା, ସମର୍ଥକଙ୍କ ମଧ୍ୟରେ ଭ୍ରୁକୁଞ୍ଚନ ସୃଷ୍ଟି କରିଛି ।
ନୟାଗଡ଼ ଜିଲ୍ଲା ଖଣ୍ଡପଡ଼ା ନିର୍ବାଚନମଣ୍ଡଳୀରେ ବିଜେପିରୁ ଇଂ. ଦୁଷ୍ମନ୍ତ କୁମାର ସ୍ୱାଇଁ ଓ କଂଗ୍ରେସରୁ ଖଣ୍ଡପଡ଼ା ବ୍ଲକ ପୂର୍ବତନ ଅଧ୍ୟକ୍ଷ ମନୋଜ କୁମାର ପ୍ରଧାନ ପ୍ରାର୍ଥୀ ହୋଇଛନ୍ତି । ହେଲେ ନିଜ ଗଡ଼ରେ ବିଜେଡିର ପ୍ରାର୍ଥୀ ଘୋଷଣା ବିଳମ୍ବିତ ହେବାରେ ଲାଗିଛି । ଗତ ନିର୍ବାଚନରେ ଖଣ୍ଡପଡ଼ାରେ ବୃହତ୍ ବିଜୟ ହାସଲ କରିଥିଲା ବିଜେଡି । ସୌମ୍ୟ ରଞ୍ଜନ ପଟ୍ଟନାୟକ ବିଧାୟକ ଭାବେ ଜିତିଥିଲେ । ହେଲେ ୨୦୨୪ରେ ଦଳବିରୋଧୀ କାର୍ଯ୍ୟ ଅଭିଯୋଗରେ ବିଜେଡି ସଭାପତି ନବୀନ ପଟ୍ଟନାୟକ ତାଙ୍କୁ ଦଳରୁ ବହିଷ୍କାର କରିଥିଲେ । ଏବେ ଟିକଟ୍ ରେସ୍ରେ ପୂର୍ବତନ ବିଧାୟକ ଅନୁଭବ ପଟ୍ଟନାୟକ, ଭାପୁର ବ୍ଲକ ଉପାଧ୍ୟକ୍ଷ ବେଣୁଧର ପ୍ରଧାନ, ଖଣ୍ଡପଡ଼ା ବ୍ଲକ ଉପାଧ୍ୟକ୍ଷ ଶିଶିର କୁମାର ସାହୁ ପ୍ରମୁଖ ଅଛନ୍ତି । ପଦ୍ମ ଛାଡ଼ି ଶଙ୍ଖ ଧରିଥିବା ଇରାନୀ ରାୟ, ଭାପୁର ବ୍ଲକ ଅଧ୍ୟକ୍ଷା ସାବିତ୍ରୀ ପ୍ରଧାନ, ବ୍ଲକ ବିଜେଡି ସଭାନେତ୍ରୀ ମିନତି ସାହୁ ମଧ୍ୟ ଟିକଟ୍ ଲବିରେ ଅଛନ୍ତି । ସୌମ୍ୟରଞ୍ଜନଙ୍କୁ ଘରବାହୁଡ଼ା ସମ୍ଭାବନାକୁ ଏଡ଼ାଇ ଦିଆଯାଇପାରୁନାହିଁ । ଏପରି କି ତାଙ୍କ ଝିଅ ତନୟା ପଟ୍ଟନାୟକଙ୍କୁ ନେଇ ବିଜେଡି ପରୀକ୍ଷା ନିରୀକ୍ଷା ମଧ୍ୟ କରିପାରେ।