ନୂଆଦିଲ୍ଲୀ: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଗିରଫ ହୋଇଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଉପରେ ଏବେ ଏନଆଇଏ କାର୍ଯ୍ୟାନୁଷ୍ଠାନ ଗ୍ରହଣ କରିପାରେ । କେଜ୍ରିଓ୍ବାଲଙ୍କ ବିରୋଧରେ ଏନଆଇଏ ତଦନ୍ତ ଲାଗି ସୁପାରିଶ କରିଛନ୍ତି ଦିଲ୍ଲୀର ଉପରାଜ୍ୟପାଳ ଭିକେ ସକ୍ସେନା । ଖଲିସ୍ତାନୀ ସମର୍ଥକ ସଂଗଠନ ଶିଖ୍ ଫର ଜଷ୍ଟିସ୍ ପାଖରୁ ଫଣ୍ଡ ଗ୍ରହଣ କରିଥିବା ଅଭିଯୋଗରେ କେଜ୍ରିଓ୍ବାଲଙ୍କ ବିରୋଧରେ ଏନଆଇଏ ତଦନ୍ତ ଲାଗି ଏହି ସୁପାରିଶ କରାଯାଇଛି । ସେ ଗୃହ ମନ୍ତ୍ରଣାଳୟକୁ ପତ୍ର ଲେଖି ଏହି ଦାବି କରିଛନ୍ତି ।
ଭାରତରେ ପ୍ରତିବନ୍ଧିତ ଆତଙ୍କବାଦୀ ସଂଗଠନ ପାଖରୁ ଏକ ରାଜନୈତିକ ଦଳ ଲକ୍ଷ ଲକ୍ଷ ଡଲାର ଗ୍ରହଣ କରିବା ନେଇ ଅଭିଯୋଗ ହୋଇଛି । ଏପରିକି ସିଏମ କେଜ୍ରିଓ୍ବାଲଙ୍କ ବିରୋଧରେ ଏହି ଅଭିଯୋଗ ହୋଇଥିବା ବେଳେ ଏନଆଇଏ ତଦନ୍ତ କରିବା ସହ ଅଭିଯୋଗକାରୀ ଦେଇଥିବା ଇଲେକ୍ଟ୍ରୋନିକ୍ ଉପକରଣର ଯାଞ୍ଚ ହେଉ ବୋଲି ଉପରାଜ୍ୟପାଳ ଭିକେ ସକ୍ସେନା ନିଜ ପତ୍ରରେ ଉଲ୍ଲେଖ କରିଛନ୍ତି ।
ଦେବେନ୍ଦ୍ର ପାଲ ଭୁଲ୍ଳରଙ୍କୁ ମୁକ୍ତ କରିବାକୁ ଚେଷ୍ଟା କରିବା ଏବଂ ଖଲିସ୍ତାନୀ ସମର୍ଥକ ସଂଗଠନ ଶିଖ ଫର ଜଷ୍ଟିସ୍ ପାଖରୁ ଆପ୍ ୧୬ ମିଲିୟନ୍ ଡଲାର ଗ୍ରହଣ କରିଥିବା ନେଇ ଏଲଜି ସକ୍ସେନାଙ୍କ ନିକଟରେ ଅଭିଯୋଗ ହୋଇଥିଲା । ଏହା ସହ କେଜ୍ରିଓ୍ବାଲଙ୍କ ପକ୍ଷରୁ ଇକବାଲ ସିଂହଙ୍କୁ ଲେଖାଯାଇଥିବା ଏକ ପତ୍ର ସଂପର୍କରେ ଉପରାଜ୍ୟପାଳ ଭିକେ ସକ୍ସେନା ଉଲ୍ଲେଖ କରିଛନ୍ତି । ତେବେ କେଜ୍ରିଓ୍ବାଲଙ୍କ ବିରୋଧରେ ଏହି ଅଭିଯୋଗ ବିଶ୍ବ ହିନ୍ଦୁ ଫେଡରେସନ୍ ଇଣ୍ଡିଆର ରାଷ୍ଟ୍ରୀୟ ସାଧାରଣ ସଂପାଦକ ଆଶୁ ମୋଙ୍ଗିୟା ଏବଂ ଆମ ଆଦମୀ ପାର୍ଟିର ପୂର୍ବତନ କାର୍ଯ୍ୟକର୍ତ୍ତା ମୁନୀଷ କୁମାର ରାୟଜାଦା କରିଥିଲେ ।
ଦେବିନ୍ଦର ପାଲ ସିଂହ ଭୁଲ୍ଲର ୧୯୯୩ ମସିହାରେ ଦିଲ୍ଲୀ ବିସ୍ଫୋରଣ ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ । ଦିଲ୍ଲୀର ଯୁବ କଂଗ୍ରେସ ମୁଖ୍ୟାଳୟ ବାହାରେ ହୋଇଥିବା ବିସ୍ଫୋରଣରେ ୯ ଜଣଙ୍କ ମୃତ୍ୟୁ ହୋଇଥିବା ବେଳେ ୩୧ ଜଣ ଆହତ ହୋଇଥିଲେ । ଜର୍ମାନୀରୁ ଫେରାଇ ଆଣିବା ପରେ ଦେବିନ୍ଦର ପାଲ ସିଂହ ଭୁଲ୍ଲରଙ୍କୁ ଗିରଫ କରାଯାଇଥିଲା ।
