ବେଙ୍ଗାଲୁରୁ,୦୯/୦୫: କର୍ଣ୍ଣାଟକ ସେକ୍ସ ସ୍କାଣ୍ଡାଲ ମାମଲାରେ ଜନତା ଦଳ (ସିକ୍ୟୁଲାର) ନେତା ଏଚ୍ ଡି ରେବନ୍ନାଙ୍କ ନ୍ୟାୟିକ ହାଜତ ମିଆଦ ମେ ୧୪ ପର୍ଯ୍ୟନ୍ତ ବୃଦ୍ଧି କରାଯାଇଛି । ଅପହରଣ ମାମଲାରେ ତାଙ୍କୁ ସ୍ୱତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଦ୍ୱାରା ଅଟକ ରଖାଯାଇଥିଲା । ତାଙ୍କୁ ପ୍ରଥମେ କୋର୍ଟ ମେ ୮ ପର୍ଯ୍ୟନ୍ତ ହାଜତ ପଠାଇଥିଲେ । ବୁଧବାର ତାହା ଶେଷ ହେବା ପରେ ପୁଣି ଏହାକୁ ମେ ୧୪ ପର୍ଯ୍ୟନ୍ତ ବଢ଼ାଯାଇଛି । ପୂର୍ବତନ ପ୍ରଧାନମନ୍ତ୍ରୀ ଏଚ୍ ଡି ଦେବେଗୌଡ଼ାଙ୍କ ପୁଅ ତଥା ଜେଡିଏସ୍ ବିଧାୟକ ରେବନ୍ନା ଏବଂ ତାଙ୍କ ସହଯୋଗୀ ସତୀଶ ବାବନ୍ନାଙ୍କୁ ଗୁରୁବାର ରାତିରେ ଗିରଫ କରାଯାଇଥିଲା । ଜଣେ ମହିଳାଙ୍କୁ ଅପହରଣ କରିବା ଅଭିଯୋଗରେ କର୍ଣ୍ଣାଟକ ପୁଲିସ ସେମାନଙ୍କୁ ଗିରଫ କରିଥିଲା । ପରେ ଏସ୍ଆଇଟି ସେମାନଙ୍କୁ ଅଟକ ରଖିଥିଲା ।
ସେପଟେ ମହିଳାଙ୍କୁ ଯୌନ ଉତ୍ପୀଡ଼ନ ଦେବା ମାମଲାରେ ରେବନ୍ନାଙ୍କ ପୁଅ ତଥା ରାଜ୍ୟର ହାସନ ଆସନରୁ ଲୋକସଭା ପ୍ରାର୍ଥୀ ପ୍ରଜ୍ୱଳ ରେବନ୍ନାଙ୍କ ବିରୋଧରେ ଜାରି ହୋଇଥିବା ବ୍ଲୁ କର୍ଣ୍ଣର ନୋଟିସ୍ ଉପରେ ଇଣ୍ଟରପୋଲ୍ ଏହାର କାର୍ଯ୍ୟ ଆରମ୍ଭ କରିଦେଇଛି । ଇଣ୍ଟରପୋଲ୍ ଏ ନେଇ ସମସ୍ତ ୧୯୬ ସଦସ୍ୟ ଦେଶକୁ ଆଲର୍ଟ କରାଇ ଦେଇଛି । ପ୍ରଜ୍ୱଳଙ୍କ ଫଟୋ ଜାରି କରାଯିବା ସହ ଯେଉଁଠି ଦେଖିଲେ ଅଟକ ରଖିବାକୁ କୁହାଯାଇଛି ।
