ମୁମ୍ବାଇ,୦୬/୦୫: ଆଇପିଏଲ୍ର ୫୫ତମ ଲିଗ୍ ମୁକାବିଲାରେ ମୁମ୍ବାଇ ଇଣ୍ଡିଆନ୍ସ ଓ ସନ୍ରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବାକୁ ଯାଉଛନ୍ତି । ପଏଣ୍ଟ ତାଲିକାରେ ନିମ୍ନ ସ୍ଥାନରେ ଥିବା ମୁମ୍ବାଇ ଇଣ୍ଡିଆନ୍ସ ପାଇଁ ଏହି ମ୍ୟାଚ୍ ‘କର ବା ମର’ ସଦୃଶ ରହିଛି । ପ୍ଲେ-ଅଫ୍ ଦୌଡ଼ରେ ରହିବାକୁ ହେଲେ ସନ୍ରାଇଜର୍ସକୁ ହରାଇବା ଜରୁରି । ପରାଜିତ ହେଲେ ପ୍ଲେ-ଅଫ୍ରୁ ବାଦ୍ ପଡ଼ିବା ନିଶ୍ଚିତ । ତେଣୁ ପାଣ୍ଡ୍ୟା ବାହିନୀ ବିଜୟ ସହ ଦୌଡ଼ରେ ରହିବାକୁ ସବୁ ଶକ୍ତି ଖଟାଇବାକୁ ପ୍ରସ୍ତୁତ । ଅନ୍ୟ ପଟରେ ସନ୍ରାଇଜର୍ସ ମୁମ୍ବାଇ ବିପକ୍ଷରେ ଚଳିତ ସିଜନରେ ଦ୍ୱିତୀୟ ବିଜୟ ଲକ୍ଷ୍ୟରେ ରହିଛି । ଫଳରେ ସୋମବାର ଏକ ସଂଘର୍ଷପୂର୍ଣ୍ଣ ମ୍ୟାଚ୍ ଦେଖିବାକୁ ମିଳିବ ।
ଗତ ମାର୍ଚ୍ଚ ୨୭ ତାରିଖରେ ଉଭୟ ଦଳ ପ୍ରଥମ ଥର ସାମ୍ନାସାମ୍ନି ହୋଇଥିଲେ ଏବଂ ଘରୋଇ ଗ୍ରାଉଣ୍ଡରେ ସନ୍ରାଇଜର୍ସ ୩୧ରନ୍ରେ ବିଜୟ ହାସଲ କରିଥିଲା । ସୋମବାର ମୁମ୍ବାଇ ଇଣ୍ଡିଆନ୍ସ ଘରୋଇ ଗ୍ରାଉଣ୍ଡ୍ ୱାଙ୍ଖଡ଼େରେ ଖେଳିବ । ଦଳ ପୂର୍ବ ପରାଜୟର ପ୍ରତିଶୋଧ ନେବାକୁ ବ୍ୟାକୁଳ । ମୁମ୍ବାଇ ଶେଷ ୪ଟି ମ୍ୟାଚ୍ରେ ପରାଜୟର ସାମ୍ନା କରିଛି । ବ୍ୟାଟିଂ ବିଭାଗର ଦୁର୍ବଳ ପ୍ରଦର୍ଶନ ଦଳ ପରାଜୟର କାରଣ ହୋଇଛି। ପ୍ଲେ-ଅଫ୍ ଦୌଡ଼ ପାଇଁ ଦଳକୁ ପୁଣିଥରେ ସଂଗଠିତ ହେବାକୁ ପଡ଼ିବ । ସୋମବାର ରୋହିତ ଶର୍ମାଙ୍କ ବ୍ୟାଟରୁ ଦର୍ଶକ ଏକ ବଡ଼ ଇନିଂସ୍ ଦେଖିବା ନେଇ ଆଶା ବାନ୍ଧିଛନ୍ତି । ପୂର୍ବ ମ୍ୟାଚ୍ରେ ସେ ପିଠି ଯନ୍ତ୍ରଣା ପାଇଁ ଇମ୍ପାକ୍ଟ ପ୍ଲେୟାର ଭାବେ କେବଳ ବ୍ୟାଟିଂ କରିଥିଲେ । ବୋଲିଂ ବିଭାଗରେ ଯଶପ୍ରୀତ ବୁମରାଙ୍କୁ ଛାଡ଼ିଦେଲେ ଅନ୍ୟ ସମସ୍ତ ବୋଲର ନିରାଶ କରିଛନ୍ତି । ବୁମରା ୧୧ଟି ମ୍ୟାଚ୍ରୁ ୧୭ଟି ୱିକେଟ୍ ନେଇ ସାରିଛନ୍ତି । ସୋମବାର ବୁମରା ଏବଂ ସନ୍ରାଇଜର୍ସ ବ୍ୟାଟରଙ୍କ ମଧ୍ୟରେ ଅସଲ ଲଢ଼େଇ ହେବ ।
ସନ୍ରାଇଜର୍ସ ୧୦ଟି ମ୍ୟାଚ୍ରୁ ୬ ବିଜୟ ସହ ମୋଟ ୧୨ପଏଣ୍ଟ ପାଇଛି । ସୋମବାର ଦଳ ମୁମ୍ବାଇକୁ ହରାଇ ପ୍ଲେ-ଅଫ୍ ଆଶା ଦୃଢ଼ କରିବାକୁ ଲକ୍ଷ୍ୟ ରଖିଛି । ସବୁ ବିଭାଗରେ ଦଳ ଭଲ ପ୍ରଦର୍ଶନ କରୁଛି । ଷ୍ଟାର୍ ବ୍ୟାଟର ଟ୍ରେଭିସ୍ ହେଡ୍, ଅଭିଷେକ ଶର୍ମା, ହେନରିକ୍ କ୍ଲାସେନ ଏବଂ ପେସ୍ ବୋଲର ପ୍ୟାଟ୍ କମିନ୍ସ ଓ ଭୁବନେଶ୍ୱର କୁମାରଙ୍କ ଉପରେ ସମସ୍ତଙ୍କ ନଜର ରହିବ ।
ୱାଙ୍ଖଡ଼େ ପିଚ୍ ବ୍ୟାଟରଙ୍କ ପାଇଁ ଅନୁକୂଳ । ମାତ୍ର ଗତ ମୁମ୍ବାଇ-ନାଇଟ୍ ରାଇଡର୍ସ ମ୍ୟାଚ୍ରେ ବୋଲରଙ୍କ ଆଧିପତ୍ୟ ଦେଖିବାକୁ ମିଳିଥିଲା । ସ୍ପିନରମାନେ ଘାତକ ସାବ୍ୟସ୍ତ ହୋଇଥିଲେ ।
ସମ୍ଭାବ୍ୟ ଏକାଦଶ
ମୁମ୍ବାଇ ଇଣ୍ଡିଆନ୍ସ: ରୋହିତ ଶର୍ମା, ଈଶାନ କିଷନ, ସୂର୍ଯ୍ୟକୁମାର ଯାଦବ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଟିମ୍ ଡେଭିଡ୍, ନେହାଲ ୱଧେରା, ରୋମାରିଓ ସେଫର୍ଡ/ ମହମ୍ମଦ ନବି, ଗେରାଲ୍ଡ କୋଏଜି, ପିୟୂଷ ଚାୱଲା, ଯଶପ୍ରୀତ ବୁମରା । ଇମ୍ପାକ୍ଟ ପ୍ଲେୟାର- ନୂଆନ ତୁଷାରା ।
ସନ୍ରାଇଜର୍ସ: ଟ୍ରେଭିସ୍ ହେଡ୍, ଅଭିଷେକ ଶର୍ମା, ଅନମୋଲପ୍ରୀତ ସିଂହ, ହେନରିକ୍ କ୍ଲାସେନ, ନିତିଶ କୁମାର ରେଡ୍ଡୀ, ଅବଦୁଲ ସମଦ, ସାହାବାଜ ଅହମ୍ମଦ, ମାର୍କୋ ଜାନସେନ, ପ୍ୟାଟ୍ କମିନ୍ସ, ଭୁବନେଶ୍ୱର କୁମାର, ଟି. ନଟରାଜନ । ଇମ୍ପାକ୍ଟ ପ୍ଲେୟାର-ଜୟଦେବ ଉନାକାତ
