ନୂଆଦିଲ୍ଲୀ,୦୭/୦୫: ଆଇପିଏଲ୍ର ୫୬ତମ ଲିଗ୍ ମୁକାବିଲାରେ ଘରୋଇ ଦିଲ୍ଲୀ କ୍ୟାପିଟାଲ୍ସ ଓ ରାଜସ୍ଥାନ ରୟାଲ୍ସ ପରସ୍ପରକୁ ଭେଟିବାକୁ ଯାଉଛନ୍ତି । ରୟାଲ୍ସ ଅଧିନାୟକ ସଞ୍ଜୁ ସାମସନ୍ ଓ କ୍ୟାପିଟାଲ୍ସ ଅଧିନାୟକ ରିଷଭ ପନ୍ତଙ୍କ ମଧ୍ୟରେ ଲଢ଼େଇ ଦେଖିବାକୁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି । ସଞ୍ଜୁ ବାହିନୀ ବିଜୟ ସହ ପ୍ଲେ-ଅଫ୍ ସ୍ଥାନ ପକ୍କା କରିବା ଲକ୍ଷ୍ୟରେ ରହିଛି । ଅନ୍ୟ ପଟରେ କ୍ୟାପିଟାଲ୍ସ ପୂର୍ବ ପରାଜୟର ପ୍ରତିଶୋଧ ନେବାକୁ ରଣନୀତି ପ୍ରସ୍ତୁତ କରିଛି । ଫଳରେ ମଙ୍ଗଳବାର ଏକ ସଂଘର୍ଷପୂର୍ଣ୍ଣ ମ୍ୟାଚ୍ ଦେଖିବାକୁ ମିଳିବ ।
ଗତ ମାର୍ଚ୍ଚ ୨୮ ତାରିଖ ଜୟପୁରରେ ଉଭୟ ଦଳ ପ୍ରଥମ ଥର ସାମ୍ନାସାମ୍ନି ହୋଇଥିଲେ ଏବଂ ରୟାଲ୍ସ ୧୨ରନ୍ରେ ଏହି ମ୍ୟାଚ୍ ଜିତିଥିଲା । ଏଥର ପନ୍ତ ବାହିନୀ ଘରୋଇ ଗ୍ରାଉଣ୍ଡ୍ରେ ଖେଳିବାକୁ ଯାଉଛି । କ୍ୟାପିଟାଲ୍ସ ଘରୋଇ ଖେଳିଥିବା ଶେଷ ୩ଟି ମ୍ୟାଚ୍ରୁ ୨ଟି ଜିତିଛି । ମୁମ୍ବାଇ ଇଣ୍ଡିଆନ୍ସ ଏବଂ ଗୁଜରାଟ ଟାଇଟନ୍ସକୁ ହରାଇଥିବାବେଳେ ସନ୍ରାଇଜର୍ସଠୁ ପରାଜିତ ହୋଇଥିଲା । ଆସନ୍ତାକାଲି ରୟାଲ୍ସକୁ ହରାଇ ପ୍ଲେ-ଅଫ୍ ଦୌଡ଼ରେ ଆଉ ପାଦେ ଆଗକୁ ବଢ଼ିବାକୁ ଲକ୍ଷ୍ୟ ରଖିଛି ।
ରୟାଲ୍ସ ଦଳ ୧୦ଟି ମ୍ୟାଚ୍ରୁ ୮ ବିଜୟ ସହ ୧୬ ପଏଣ୍ଟ ପାଇଛି। ଦଳ ନିକଟରେ ଶୀର୍ଷ ସ୍ଥାନକୁ ଫେରିବାର ସୁଯୋଗ ରହିଛି । ୫ ସପ୍ତାହ ଧରି ଶୀର୍ଷରେ ରହିବା ପରେ ଶେଷରେ ଦଳ ଦ୍ୱିତୀୟକୁ ଖସିଥିଲା। ନାଇଟ୍ ରାଇଡର୍ସ ସମାନ ସଂଖ୍ୟକ ପଏଣ୍ଟ ପାଇଥିଲେ ହେଁ ଉନ୍ନତ ନେଟ୍ ରନ୍ରେଟରେ ଶୀର୍ଷରେ ରହିଛି । ଗତ ୨ତାରିଖରେ ରୟାଲ୍ସ ଶେଷ ମ୍ୟାଚ୍ରେ ସନ୍ରାଇଜର୍ସ ନିକଟରୁ ହାରି ଯାଇଥିଲା । ୪ଦିନର ବିଶ୍ରାମ ସମୟ ମିଳିଥିବାରୁ ପୂର୍ବ ତ୍ରୁଟି ସୁଧାରି ନେଇଛି । ମଙ୍ଗଳବାର ଦଳ ପରିବର୍ତ୍ତନ ହେବାର କୌଣସି ସମ୍ଭାବନା ନାହିଁ । ଜୋସ୍ ବଟଲର ଓ ୟୁଝବେନ୍ଦ୍ର ଚହଲ ଇମ୍ପାକ୍ଟ ପ୍ଲେୟାର ଭାବେ ଅଦଳ ବଦଳ ହେବେ । ରୟାଲ୍ସ ଦଳଗତ ପ୍ରଦର୍ଶନ ବଳରେ ଟାଇଟଲ ଦାବିଦାର ଭାବେ ଉଭା ହୋଇଛି । ପ୍ରତି ମ୍ୟାଚ୍ରେ ଭିନ୍ନ ଭିନ୍ନ ଖେଳାଳି ମ୍ୟାଚ୍ ବିଜୟୀ ପ୍ରଦର୍ଶନ ଦେଇଛନ୍ତି । ମଙ୍ଗଳବାର ବଟଲର, ଯଶସ୍ୱୀ ଜୈସ୍ୱାଲ୍ ଓ ସାମସନ୍ଙ୍କ ଉପରେ ସମସ୍ତଙ୍କ ନଜର ରହିବ ।
କ୍ୟାପିଟାଲ୍ସ ୧୧ଟି ମ୍ୟାଚ୍ରୁ ୫ ବିଜୟ ସହ ୧୦ପଏଣ୍ଟ ପାଇଛି । ପୂର୍ବ ମ୍ୟାଚ୍ରେ ଦଳ ନାଇଟ୍ ରାଇଡର୍ସ ନିକଟରୁ ହାରି ଯାଇଥିଲା । ମଙ୍ଗଳବାର ମ୍ୟାଚ୍ ଜରିଆରେ ଦଳକୁ ବିଜୟକୁ ଫେରିବା ପାଇଁ ବ୍ୟାକୁଳ ରହିଛି । ଯୁବ ବ୍ୟାଟିଂ ବିସ୍ମୟ ଜାକ ଫ୍ରେଜର-ମ୍ୟାକ୍ଗର୍କଙ୍କ ଦୁର୍ଦ୍ଧର୍ଷ ବ୍ୟାଟିଂ ସମ୍ପ୍ରତି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ମଙ୍ଗଳବାର ମ୍ୟାକ୍ଗର୍କ ଓ ରୟାଲ୍ସ ବୋଲିଂ ବିଭାଗ ମଧ୍ୟରେ ଅସଲ ଲଢ଼େଇ ଦେଖିବାକୁ ମିଳିବ । ପନ୍ତ, ଟ୍ରିଷ୍ଟନ ଷ୍ଟବ୍ସ ଓ ଅକ୍ଷର ପଟେଲ ଫର୍ମରେ ରହିଛନ୍ତି । ଅଭିଜ୍ଞ ପେସ୍ ବୋଲର ଈଶାନ୍ତ ଶର୍ମା ଫିଟ୍ ଘୋଷିତ ହୋଇଛନ୍ତି । ତାଙ୍କ ପ୍ରତ୍ୟାବର୍ତ୍ତନ ବୋଲିଂ ବିଭାଗକୁ ସୁଦୃଢ଼ କରିବ ।
ଅରୁଣ ଜେଟଲୀ ଷ୍ଟାଡିୟମର ପିଚ୍ ବ୍ୟାଟିଂ ପାଇଁ ଅନୁକୂଳ । ଏଠାରେ ପ୍ରଥମ ଇନିଂସ୍ରେ ଆଭରେଜ୍ ସ୍କୋର ୨୪୯ ରହିଛି । ଏହି ପିଚ୍ରେ ଚଳିତ ସିଜନରେ ସର୍ବାଧିକ ୧୧.୩୮ ରନ୍ରେଟ୍ ରନ୍ ସଂଗୃହୀତ ହୋଇଛି । ମଙ୍ଗଳବାର ମ୍ୟାଚ୍ ହାଇସ୍କୋରିଂ ହେବା ନିଶ୍ଚିତ ।
ସମ୍ଭାବ୍ୟ ଏକାଦଶ
କ୍ୟାପିଟାଲ୍ସ: ଜାକ ଫ୍ରେଜର-ମ୍ୟାକ୍ଗର୍କ, ଅଭିଷେକ ପୋରେଲ, ସାଇ ହୋପ୍, ଟ୍ରିଷ୍ଟନ ଷ୍ଟବ୍ସ, ରିଷଭ ପନ୍ତ (ଅଧିନାୟକ), ଅକ୍ଷର ପଟେଲ, କୁମାର କୁଶାଗ୍ର, କୁଲଦୀପ ଯାଦବ, ଖଲିଲ ଅହମ୍ମଦ, ଲିଜାର୍ଡ ୱିଲିୟମ୍ସ, ମୁକେଶ କୁମାର । ଇମ୍ପାକ୍ଟ ପ୍ଲୋୟାର- ରସିଖ ସଲାମ ।
ରାଜସ୍ଥାନ ରୟାଲ୍ସ: ଜୋସ ବଟଲର, ଯଶସ୍ୱୀ ଜୈସ୍ୱାଲ୍, ସଞ୍ଜୁ ସାମସନ (ଅଧିନାୟକ), ରିୟାନ ପରାଗ, ସିମରନ ହେତମାୟର, ରୋଭମାନ ପାୱେଲ, ଧ୍ରୁବ ଜୁରେଲ, ଆର୍ ଅଶ୍ୱିନ, ଟ୍ରେଣ୍ଟ୍ ବୋଲ୍ଟ, ଅଭେଶ ଖାନ, ସନ୍ଦୀପ ଶର୍ମା । ଇମ୍ପାକ୍ଟ ପ୍ଲେୟାର- ୟୁଝବେନ୍ଦ୍ର ଚହଲ
