ଭୁବନେଶ୍ୱର, ୨୧।୪: ସବୁଥର ଭଳି ଏଥର ନିର୍ବାଚନରେ ଭୋଟର ତୁଷ୍ଟିକରଣ ପାଇଁ ମୁଖ୍ୟ ପ୍ରଲୋଭନ ସାମଗ୍ରୀ ପାଲଟିବ ନିଶାଦ୍ରବ୍ୟ । ନିର୍ବାଚନ ପ୍ରଚାର ବେଳେ ପେଟି ପେଟି ମଦ ଉଡ଼ିବ । ଏହି ମଉକାରେ ଅନ୍ତଃରାଜ୍ୟ ନିଶା ମାଫିଆମାନେ ବେଶ୍ ସକ୍ରିୟ ହୋଇଗଲେଣି । ସୀମା ସରହଦ ଡେଇଁ ପଡ଼ୋଶୀ ରାଜ୍ୟରୁ ବିପୁଳ ମାତ୍ରାରେ ନକଲି ମଦ ଓ ଧଳା ଜହର ଚୋରା ଚାଲାଣରେ ମାତିଛନ୍ତି । ରବିବାର ରାତିରେ ରାଉରକେଲା ଅବକାରୀ ଟିମ୍ ବଣାଇଗଡ଼ ଅଞ୍ଚଳରେ ଚଢ଼ାଉ କରି ୪ ଲକ୍ଷ ଟଙ୍କାର ନକଲି ମଦ ଜବତ କରିଥିଲା । ମାମଲାରେ ପେସାଦାର ଚୋରା ମଦ ବେପାରୀ ବଳଭଦ୍ର ପାତ୍ରକୁ ଗିରଫ କରାଯାଇଛି । ତଦନ୍ତରୁ ଜଣାପଡ଼ିଛି, ଝାଡ଼ଖଣ୍ଡରୁ ବିପୁଳ ମାତ୍ରାରେ ନକଲି ମଦ ସ୍ପିରିଟ୍ ଓଡ଼ିଶାକୁ ଅଣାଯାଉଛି । ଝାଡ଼ଖଣ୍ଡ ପଶ୍ଚିମସିଂହଭୂମ ଜିଲ୍ଲା ମନୋହରପୁର ସବ୍ ଡିଭିଜନ ହେଉଛି ନକଲି ମଦର ମୁଖ୍ୟ ହବ୍ । ମନୋହରପୁରରୁ ରାଉରକେଲା ଦୂରତା ୫୦ କିମି । ସୀମାବର୍ତ୍ତୀ ଚେକ୍ପୋଷ୍ଟକୁ ଚକ୍ମା ଦେଇ ଜଙ୍ଗଲ ରାସ୍ତା ପଟେ ବେଧଡ଼କ ମଦ ଚାଲାଣ ହେଉଛି । ଅଧିକାଂଶ ମଦରେ ଅରୁଣାଞ୍ଚଳ ପ୍ରଦେଶର ‘ଡ୍ରିମ୍ ଗାର୍ଲ’ ‘ନାଇଟ୍ ଗାର୍ଲ’ ବ୍ରାଣ୍ଡ ଲୋଗୋ ରହିଛି ।
ମଣିପୁରରେ ନିର୍ବାଚନୀ ହିଂସା:ମତଦାନ କେନ୍ଦ୍ରରେ ଫୁଟିଲା ଗୁଳି, ୩ ଆହତ
ପୂର୍ବତନ ଅବକାରୀ ଆୟୁକ୍ତ ସୁଦର୍ଶନ ନାୟକ କହିଛନ୍ତି, ବିହାରରେ ମଦ ବ୍ୟାନ୍ ପରଠୁ ଝାଡ଼ଖଣ୍ଡ ଓ ଛତିଶଗଡ଼ ନକଲି ମଦ ପ୍ରସ୍ତୁତିର ହବ୍ ପାଲଟିଛି । ସେଠାକାର କିଛି ମଦ ମାଫିଆଙ୍କ ସହ ଓଡ଼ିଶାର ମଦ ବେପାରୀ ଡିଲ୍ କରିଛନ୍ତି । ନିଶା ମାଫିଆମାନେ ନିର୍ବାଚନରେ ନକଲି ମଦ ବାଣ୍ଟି ମୋଟା ଅଙ୍କର ଟଙ୍କା କମାଇବା ଆଶାରେ ଅଛନ୍ତି । ପ୍ରତିଦିନ ସୀମା ସରହଦ ପାର୍ ହୋଇ ବିପୁଳ ମାତ୍ରାରେ ନକଲି ମଦ ବୋତଲ, ମଦ ସ୍ପିରିଟ୍ ଓଡ଼ିଶା ଆସୁଛି । ଖାଲି ରାଉରକେଲା ନୁହେଁ, ମୟୁରଭଞ୍ଜ କେନ୍ଦୁଝର, ଦେବଗଡ଼, ବରଗଡ଼, ନୂଆପଡ଼ା ଭଳି ଅନ୍ୟ ସୀମାବର୍ତ୍ତୀ ଜିଲ୍ଲାର କିଛି ଅଞ୍ଚଳକୁ ପଡ଼ୋଶୀ ରାଜ୍ୟରୁ ବେଧଡ଼କ ନକଲି ମଦ ଚାଲଣ ହେଉଛି । ନିଶା ମାଫିଆମାନେ ପଶ୍ଚିମବଙ୍ଗ କୋଲକାତାରୁ ଠିପି, ସିଲ୍, ଖାଲି ମଦ ବୋତଲ ଓ ଷ୍ଟିକର କିଣୁଛନ୍ତି । ନକଲି ଓ ଅପମିଶ୍ରିତ ସ୍ପିରିଟ୍ରେ ମଦ ପ୍ରସ୍ତୁତ କରି ନିର୍ବାଚନ ପାଇଁ ଗଚ୍ଛିତ ରଖୁଛନ୍ତି । ଶ୍ରୀ ନାୟକଙ୍କ କହିବା ମୁତାବକ, ପଶ୍ଚିମବଙ୍ଗ ମୁର୍ସିଦାବାଦ୍ ଜିଲ୍ଲାର ଲାଲ୍ଗୋଲା ହେଉଛି ବ୍ରାଉନ୍ସୁଗର ହବ୍ । ଲାଲ୍ଗୋଲାରୁ ଜଳେଶ୍ୱର ଯାଏଁ ଲମ୍ବିଥିବା ଧଳାଜହର ସିଣ୍ଡିକେଟ୍ ବାବଦରେ କାହାରିକୁ ଅଛପା ନାହିଁ ।
୯୮ତମ ନିର୍ବାଚନରେ ହାରିବା ପରେ ବି ହାର୍ ମାନି ନାହାନ୍ତି ହସନୁରାମ ଅମ୍ବେଡକରୀ, ‘ଶତକ’ ଲଗାଇବାକୁ ଇଛା
ନିର୍ବାଚନ ମାହୋଲରେ ଏହି ରୁଟ୍ରେ ଧଳାଜହର ଚାଲାଣ ଢ଼େର୍ ବଢ଼ିବା ଆଶଙ୍କା ରହିଛି । ଆନ୍ତଃରାଜ୍ୟ ନିଶା ମାଫିଆଙ୍କ ସିଣ୍ଡିକେଟ୍ ମୂଳପୋଛ ପାଇଁ ଅବକାରୀ ବିଭାଗକୁ ଆହୁରି ସତର୍କ ହେବାକୁ ପଡ଼ିବ । ଓଡି଼ଶାର ଅବକାରୀ ଆୟୁକ୍ତ ତଥା ବରିଷ୍ଠ ଆଇପିଏସ୍ ନରସିଂହ ଭୋଳ କହିଛନ୍ତି, ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ, ଆନ୍ଧ୍ରପ୍ରଦେଶ ସୀମାବର୍ତ୍ତୀ ଚେକ୍ପୋଷ୍ଟରେ ଚେକିଂ କଡ଼ାକଡି଼ କରାଯାଇଛି । ବର୍ତ୍ତମାନ ସୁଦ୍ଧା ପଶ୍ଚିମବଙ୍ଗ ଓ ଝାଡ଼ଖଣ୍ଡ ସୀମାନ୍ତରେ ୫ଟି ଲେଖାଏଁ ଚେକ୍ ପୋଷ୍ଟ ରହିଛି । ଛତିଶଗଡ଼ ସୀମାନ୍ତରେ ୧୭ଟି, ଆନ୍ଧ୍ରପ୍ରଦେଶ ସୀମାନ୍ତରେ ୮ଟି ଚେକ୍ ପୋଷ୍ଟ କାର୍ଯ୍ୟକ୍ଷମ । ଆଗକୁ ଅଧିକ ଅସ୍ଥାୟୀ ଚେକ୍ପୋଷ୍ଟ ନିର୍ମାଣ ହେବ । ପଡ଼ୋଶୀ ରାଜ୍ୟ ଅବକାରୀ ଅଧିକାରୀମାନଙ୍କ ସହଯୋଗରେ ମିଳିତ ଏନ୍ଫୋର୍ସମେଣ୍ଟ ଟିମ୍ ଗଢ଼ାଯାଇଛି । ହ୍ୱାଟସ୍ଆପ ଗ୍ରୁପ୍ରେ ଗୁଇନ୍ଦା ତଥ୍ୟ ଆଦାନପ୍ରଦାନ ଚାଲିଛି । ନିଶା ବେପାରୀଙ୍କ ଉପରେ ମିଳିତ ଚଢ଼ାଉ ହେଉଛି । ସୀମା ଚେକ୍ ପୋଷ୍ଟରେ ଯାଞ୍ଚ ବେଳେ ୨ କୋଟି ୯୪ ଲକ୍ଷ ୫୦ ହଜାର ଟଙ୍କା ମୂଲ୍ୟର ୧୪ ଲକ୍ଷ ୬୦ ହଜାର ୭୮ ଲିଟର ମଦ ଜବତ ହୋଇଛି ।