ନୂଆଦିଲ୍ଲୀ,୯।୫: ଦିଲ୍ଲୀ ମଦ ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଅଡୁଆ କମୁନି। ପ୍ରବର୍ତ୍ତନ ନିର୍ଦେଶାଳୟ(ଇଡି)ଆସନ୍ତାକାଲି(୧୦ ମେ) ଏହି ମାମଲାରେ କେଜ୍ରିଓ୍ବାଲଙ୍କ ବିରୋଧରେ ଚାର୍ଜସିଟ୍ ଦାଖଲ କରିବାକୁ ଯାଉଛି। ଏହା ପ୍ରଥମ ଥର ହେବ, ଯେବେ କେଜ୍ରିଓ୍ବାଲଙ୍କ ନାଁ ଚାର୍ଜସିଟ୍ରେ ଦାଖଲ କରାଯିବ। ଇଡି ନିଜ ଚାର୍ଜସିଟ୍ରେ କେଜ୍ରିଓ୍ବାଲଙ୍କ ନାଁ ମୁଖ୍ୟ ଷଡଯନ୍ତ୍ରକାରୀ ଓ କିଙ୍ଗପିନ୍ ଭାବରେ ଦାଖଲ କରିବାକୁ ଯାଉଛି ଶୁଣାଣିର ଗୋଟିଏ ଦିନ ପୂର୍ବରୁ ଅର୍ଥାତ ଗୁରୁବାର ଇଡି ଅନ୍ତରୀଣ ଜାମିନ୍ ଆବେଦନକୁ ବିରୋଧ କରି ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିଛି। ଏହା ସହ କହିଛି ନିର୍ବାଚନ ପ୍ରଚାର ମୌଳିକ ଅଧିକାର ନୁହେଁ।
ଇଡି ଉପ ନିର୍ଦେଶକ ଭାନୁ ପ୍ରିୟା କେଜ୍ରିଓ୍ବାଲଙ୍କ ଜାମିନ୍ ଆବେଦନ ଉପରେ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିଛନ୍ତି। ସେ କହିଛନ୍ତି, ନିର୍ବାଚନ ପ୍ରଚାର ଆଧାରରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଅନ୍ତରୀର ଜାମିନ୍ ଦେବା ଠିକ୍ ନୁହେଁ, କାରଣ ତାଙ୍କ ଭଳି ସବୁ ରାଜନେତା ଅପରାଧ କରି ନିର୍ବାଚନ କାରଣ ଦର୍ଶାଇ ଯାଞ୍ଚରୁ ବଞ୍ଚିବାକୁ ଅନୁମତି ମାଗିବେ। ନିର୍ବାଚନ ପ୍ରଚାର କୌଣସି ମୌଳିକ କିମ୍ବା ସମ୍ବିଧାନିକ ଅଧିକାର ନୁହେଁ।ଏପରିକି ଆଇନଗତ ଅଧିକାର ପରିସରରେ ଆସୁନି। ଇଡିର ସୂଚନାରେ ଏଭଳି କୌଣସି ଘଟଣା ନାହିଁ, କୌଣସି ରାଜନୈତିକ ନେତାଙ୍କୁ ନିର୍ବାଚନ ପ୍ରଚାର ପାଇଁ ଅନ୍ତରୀଣ ଜାମିନ୍ ଦିଆଯାଇଛି। ଏପରିକି ନିର୍ବାଚନ ଲଢୁଥିଲେ ମଧ୍ୟ ଜାମିନ ମିଳିନି। ପ୍ରାୟ ୧୨୩ ନିର୍ବାଚନ ହୋଇସାରିଛି, ଆମେ ଗତ ୩ ବର୍ଷ ହେବ ଅଛୁ ଓ ଯଦି ନିର୍ବାଚନ ପ୍ରଚାର ପାଇଁ ଅନ୍ତରୀଣ ଜାମିନ୍ ଦିଆଯିବ ତେବେ କୌଣସି ରାଜନେତାଙ୍କୁ ଗିରଫ କରିହେବନି, କାରଣ ନିର୍ବାଚନ ପୁରା ବର୍ଷ ଧରି ଚାଲିଥାଏ।
ଉଲ୍ଲେଖନୀୟ ଯେ, ଶୁକ୍ରବାର ସୁପ୍ରିମକୋର୍ଟ କେଜ୍ରିଓ୍ବାଲଙ୍କ ଅନ୍ତରୀଣ ଜାମିନ୍ ଉପରେ ଶୁଣାଣି କରିପାରନ୍ତି। କେଜ୍ରିଓ୍ବାଲଙ୍କ ଜାମିନ୍ ଆବେଦନ ଉପରେ ଶୁଣାଣି କରି ଜଷ୍ଟିସ୍ ସଞ୍ଜୀବ ଖାନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଶୁକ୍ରବାର ଅନ୍ତରୀଣ ଜାମିନ୍ ନିର୍ଦେଶ ଶୁଣାଇବ। ଗିରଫକୁ ଚ୍ୟାଲେଞ୍ଜ ଦେବା ସମ୍ପର୍କିତ ମୁଖ୍ୟ ମାମଲାରେ ଉପରେ ମଧ୍ୟ ସେହି ଦିନ ରାୟ ଦିଆଯିବ।