ନୂଆଦିଲ୍ଲୀ: ଦିଲ୍ଲୀର ଅରୁଣ ଜେଟଲୀରେ ଦିଲ୍ଲୀ କ୍ୟାପିଟାଲ୍ସ ଭଲ ପ୍ରଦର୍ଶନ କରିଛି । ନିର୍ଦ୍ଧାରିତ ଓଭରରେ ୮ ଓ୍ବିକେଟ ହରାଇ ଦିଲ୍ଲୀ ୨୨୧ ରନ୍ କରିଛି । ଆଜିର ମ୍ୟାଚର ଦୁଇ ଓପନର ଜେକ ଫ୍ରେଜର ମ୍ୟାକଗର୍କ ଏବଂ ଅଭିଷେକ ପୋରେଲ୍ ଦମଦାର ଅର୍ଦ୍ଧଶତକ କରିଛନ୍ତି । ମ୍ୟାକଗର୍କଙ୍କ ୫୦ ରନ୍ ଏବଂ ଅଭିଷେକ ପୋରେଲ୍ଙ୍କ ୬୫ ରନ୍ ବଳରେ ଦଳ ପ୍ରତିପକ୍ଷ ରାଜସ୍ଥାନ ରୟାଲ୍ସକୁ ୨୨୨ ରନ୍ ଟାର୍ଗେଟ ଦେଇଛି ।
ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୪ର ୫୬ ତମ ମ୍ୟାଚ୍ରେ ଟସ୍ ହାରି ପ୍ରଥମେ ବ୍ୟାଟିଂ କରିଛି ଦିଲ୍ଲୀ କ୍ୟାପିଟାଲ୍ସ । ଜ୍ୟାକ ଫ୍ରେଜର ମ୍ୟାକଗର୍କ (୫୦), ଅଭିଷେକ ପୋରେଲ (୬୫), ଶାଇ ହୋପ (୧), ଅକ୍ଷର ପଟେଲ (୧୫), ରିଷଭ ପନ୍ତ (୧୫), ତ୍ରିଷ୍ଟାନ ଷ୍ଟବ୍ସ (୪୧), ଗୁଲବାଦିନ ନାଇବ (୧୯), ରାଶିଖ ଦାର ସାଲାମ (୯) ଏବଂ କୁଲଦୀପ ଯାଦବଙ୍କ ଅପରାଜିତ ୫ ରନ୍ କରିଛନ୍ତି । ସେପଟେ ରାଜସ୍ଥାନ ରୟାଲ୍ସର ରବିଚନ୍ଦ୍ରନ ଅଶ୍ବିନ ୨୪ ରନ୍ ଦେଇ ସର୍ବାଧିକ ୩ ଓ୍ବିକେଟ ନେଇଛନ୍ତି । ଟ୍ରେଣ୍ଟ ବୋଲ୍ଟ , ସନ୍ଦୀପ ଶର୍ମା ଏବଂ ଯୁଜବେନ୍ଦ୍ର ଚହଲ ଗୋଟିଏ ଓ୍ବିକେଟ ନେଇଛନ୍ତି ।
ସେପଟେ ପଏଣ୍ଟ ଟେବୁଲ କଥା ଦେଖିଲେ, ରାଜସ୍ଥାନ ରୟାଲ୍ସ ୧୦ରୁ ୮ଟି ମ୍ୟାଚ୍ରେ ବିଜୟୀ ଦ୍ବିତୀୟ ସ୍ଥାନରେ ରହିଛି । ସେହିଭଳି ଦିଲ୍ଲୀ କ୍ୟାପିଟାଲ୍ସ ୧୧ଟି ମ୍ୟାଚ୍ ଖେଳିଥିବା ବେଳେ ମାତ୍ର ୫ଟିରେ ବିଜୟ ହାସଲ କରିଛି । ଏହା ସହ ପଏଣ୍ଟ ଟେବୁଲ୍ର ୬ ନମ୍ବର ସ୍ଥାନରେ ରହିଛି ଦିଲ୍ଲୀ ।
