ନୂଆଦିଲ୍ଲୀ: ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଦିଲ୍ଲୀ କ୍ୟାପିଟାଲ୍ସ ପାଖରୁ ପରାଜୟ ବରଣ କରିଛି ରାଜସ୍ଥାନ ରୟାଲ୍ସ ।୨୨୨ ରନର ପିଛା କରିବାକୁ ଆସିଥିବା ରାଜସ୍ଥାନ ୨୦ ଓଭର ଶେଷ ସୁଦ୍ଧା ୮ ଓ୍ବିକେଟ ହରାଇ ୨୦୧ ରନ୍ରେ ଅଟକି ଯାଇଛି । ଏହା ସହ ୨୦ ରନ୍ରେ ବିଜୟ ହାସଲ କରିଛି ଦିଲ୍ଲୀ କ୍ୟାପିଟାଲ୍ସ । ଆଜିର ମ୍ୟାଚ୍ରେ ରାଜସ୍ଥାନ ଟିମ୍ର ଅଧିନାୟକ ସଞ୍ଜୁ ସାମସନ ଭଲ ପ୍ରଦର୍ଶନ କରିବା ସହ ୮୬ ରନ୍ କରି ପ୍ୟାଭିଲିୟନ୍ ଫେରିଥିଲେ । ତାଙ୍କ ବ୍ୟତୀତ ଅନ୍ୟ ଖେଳାଳି ସେତେଟା ଭଲ ପ୍ରଦର୍ଶନ କରିନପାରିବାରୁ ଦଳକୁ ପରାଜୟର ସାମ୍ନା କରିବାକୁ ପଡ଼ିଛି । ଆଜିର ମ୍ୟାଚରେ ଦିଲ୍ଲୀର ଉଭୟ ବ୍ୟାଟର ଏବଂ ବୋଲର ଦମଦାର ପ୍ରଦର୍ଶନ କରିଛନ୍ତି । ଖଲିଳ ଅହମ୍ମଦ, ମୁକେଶ କୁମାର ଏବଂ କୁଲଦୀପ ଯାଦବ ୨ଟି ଲେଖାଏଁ ଓ୍ବିକେଟ ନେଇଛନ୍ତି ।
ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ନିର୍ଦ୍ଧାରିତ ଓଭରରେ ୮ ଓ୍ବିକେଟ ହରାଇ ୨୨୧ ରନ୍ କରିଥିଲା । ଆଜିର ମ୍ୟାଚର ଦୁଇ ଓପନର ଜେକ ଫ୍ରେଜର ମ୍ୟାକଗର୍କ ଏବଂ ଅଭିଷେକ ପୋରେଲ୍ ଦମଦାର ଅର୍ଦ୍ଧଶତକ କରିଥିଲେ । ମ୍ୟାକଗର୍କଙ୍କ ୫୦ ରନ୍ ଏବଂ ଅଭିଷେକ ପୋରେଲ୍ଙ୍କ ୬୫ ରନ୍ ବଳରେ ଦଳ ପ୍ରତିପକ୍ଷ ରାଜସ୍ଥାନ ରୟାଲ୍ସକୁ ୨୨୨ ରନ୍ ଟାର୍ଗେଟ ଦେଇଥିଲା ।ହେଲେ ଏହି ଲକ୍ଷ୍ୟ ହାସଲ କରିବାରେ ବିଫଳ ହୋଇଛି ରାଜସ୍ଥାନ ।
ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୪ର ୫୬ ତମ ମ୍ୟାଚ୍ରେ ଟସ୍ ହାରି ପ୍ରଥମେ ବ୍ୟାଟିଂ କରିଥିଲା ଦିଲ୍ଲୀ କ୍ୟାପିଟାଲ୍ସ । ଜ୍ୟାକ ଫ୍ରେଜର ମ୍ୟାକଗର୍କ (୫୦), ଅଭିଷେକ ପୋରେଲ (୬୫), ଶାଇ ହୋପ (୧), ଅକ୍ଷର ପଟେଲ (୧୫), ରିଷଭ ପନ୍ତ (୧୫), ତ୍ରିଷ୍ଟାନ ଷ୍ଟବ୍ସ (୪୧), ଗୁଲବାଦିନ ନାଇବ (୧୯), ରାଶିଖ ଦାର ସାଲାମ (୯) ଏବଂ କୁଲଦୀପ ଯାଦବଙ୍କ ଅପରାଜିତ ୫ ରନ୍ କରିଥିଲେ । ସେପଟେ ରାଜସ୍ଥାନ ରୟାଲ୍ସର ରବିଚନ୍ଦ୍ରନ ଅଶ୍ବିନ ୨୪ ରନ୍ ଦେଇ ସର୍ବାଧିକ ୩ ଓ୍ବିକେଟ ନେଇଥିଲେ । ଟ୍ରେଣ୍ଟ ବୋଲ୍ଟ , ସନ୍ଦୀପ ଶର୍ମା ଏବଂ ଯୁଜବେନ୍ଦ୍ର ଚହଲ ଗୋଟିଏ ଓ୍ବିକେଟ ନେଇଥିଲେ।