ଭୁବନେଶ୍ୱର,୩୦/୦୪: ବିଶ୍ୱ ଦେଖିବ ଦୁଇ ଚର୍ଚ୍ଚିତ ଓଡ଼ିଆ ସିନେମା ‘ଦମନ’ ଓ ‘ପ୍ରତୀକ୍ଷା’ । ଆରମ୍ଭ ହେବାକୁ ଯାଉଥିବା ଇଣ୍ଡୋ ଆମେରିକାନ୍ ଆର୍ଟସ୍ କାଉନ୍ସିଲ୍ ପକ୍ଷରୁ ନ୍ୟୁୟର୍କ ଇଣ୍ଡିଆନ୍ ଫିଲ୍ମ ଫେଷ୍ଟିଭାଲ୍(ଏନ୍ୱାଇଆଇଏଫ୍ଏଫ୍) ପାଇଁ ମନୋନୀତ ହୋଇଛି ଏହି ଦୁଇ ଓଡ଼ିଆ ସିନେମା । ବିଭିନ୍ନ ଭାରତୀୟ ଭାଷାର ୫୦ଟି ଫିଲ୍ମ ଭିତରେ ଏହି ସିନେମାଦ୍ୱୟ ସ୍ଥାନ ପାଇଛି । ଏହାକୁ ନେଇ ଓଡ଼ିଆ ସିନେମା ଜଗତରେ ଉତ୍ସାହ ଦେଖାଦେଇଛି । ଉଭୟ ସିନେମାର ନିର୍ମାଣ ଟିମ୍ ଖୁସି ବ୍ୟକ୍ତ କରିଛନ୍ତି ।
ମାଲକାନଗିରି ଜିଲ୍ଲାର ଉପାନ୍ତ ଅଞ୍ଚଳରେ ସ୍ୱାସ୍ଥ୍ୟସେବାର ବିକଳ ଚିତ୍ର ମଧ୍ୟରେ ଜଣେ ଯୁବ ଡାକ୍ତରଙ୍କ କର୍ତ୍ତବ୍ୟନିଷ୍ଠ କାହାଣୀକୁ ନେଇ "ଦମନ' ଜାତୀୟ ସ୍ତରରେ ଓଡ଼ିଆ ସିନେମାକୁ ଏକ ନୂଆ ପରିଚୟ ଦେଇଥିଲା । ମୁଖ୍ୟ ଭୂମିକାରେ ଅଭିନେତା ବାବୁସାନ ଓ ଦୀପନ୍ୱିତ ଦାଶ ମହାପାତ୍ରଙ୍କ ଚମତ୍କାର ଅଭିନୟରେ ଅଭିଭୂତ ହୋଇଥିଲେ ଦର୍ଶକ । ଏହାର କାହାଣୀ ଓ ଚିତ୍ରନାଟ୍ୟ ଲେଖିବା ସହିତ ନିର୍ଦ୍ଦେଶନା ଦେଇଥିଲେ ବିଶାଲ ମୌର୍ଯ୍ୟ ଓ ଦେବୀ ପ୍ରସାଦ ଲେଙ୍କା । ପ୍ରଯୋଜନା କରିଥିଲେ ଦୀପେନ୍ଦ୍ର ସାମଲ । ଏନ୍ୱାଇଆଇଏଫ୍ଏଫ୍ରେ ଜୁନ୍ ୧ ତାରିଖ ଅପରାହ୍ନ ସାଢ଼େ ୩ଟାରେ ଆଞ୍ଜେଲିକା ଭିଲେଜ୍ ଇଷ୍ଟ ଥିଏଟର-୫ରେ ସିନେମା "ଦମନ' ପ୍ରଦର୍ଶିତ ହେବ ବୋଲି ସୂଚନା ମିଳିଛି ।
୨୦୨୨ ମସିହା, ନଭେମ୍ବର ୪ରେ ଓଡ଼ିଆରେ, ୨୦୨୩, ଫେବୃଆରୀ ୩ରେ ହିନ୍ଦୀରେ ରିଲିଜ୍ ହୋଇଥିଲା । ସେହିପରି ବିଶିଷ୍ଟ କଥାକାର ଗୌରହରି ଦାସଙ୍କ କାହାଣୀ ଓ ଅନୁପମ ପଟ୍ଟନାୟକଙ୍କ ନିର୍ଦ୍ଦେଶିତ ଜାତୀୟ ଚଳଚ୍ଚିତ୍ର ପୁରସ୍କାରପ୍ରାପ୍ତ ସିନେମା "ପ୍ରତୀକ୍ଷା' ଜୁନ୍ ୨ ତାରିଖ ଅପରାହ୍ଣ ସାଢ଼େ ୩ଟାରେ ସେହି ଇଷ୍ଟ ଥିଏଟର-୫ରେ ପ୍ରଦର୍ଶିତ ହେବ । ଏହି ସିନେମାରେ ମଧ୍ୟବିତ୍ତ ପରିବାରରେ ବାପ-ପୁଅଙ୍କ ସମ୍ପର୍କ ଓ ସମସ୍ୟାର ଅତିବିଶ୍ୱସନୀୟ ଚିତ୍ର ରହିଥିଲା । ଯାହାକୁ କେବଳ ଓଡ଼ିଆ ନୁହେଁ, ଅନ୍ୟ ଭାଷାର ଦର୍ଶକ ଓ ସମାଲୋଚକ ଉଚ୍ଚ ପ୍ରଶଂସା କରିଥିଲେ । ୨୦୨୨, ଡିସେମ୍ବର ୨ରେ ଏହା ମୁକ୍ତିଲାଭ କରିଥିଲା । ୬୯ତମ ଜାତୀୟ ଚଳଚ୍ଚିତ୍ର ପୁରସ୍କାର ବିତରଣ ସମାରୋହରେ ଫିଚର ଫିଲ୍ମ ବର୍ଗରେ ଏହା ଜାତୀୟ ପୁରସ୍କାର ପାଇଥିଲା । ଏହାକୁ ହିନ୍ଦୀରେ ରିମେକ୍ ପାଇଁ ବଲିଉଡ ଷ୍ଟାର୍ ଅନୁପମ ଖେର ବଇନା ଦେଇଥିଲେ । ସିନେମାଟି ବିଶ୍ୱବ୍ୟାପୀ ବିଭିନ୍ନ ଫେଷ୍ଟିଭାଲ୍ରେ ପ୍ରଦର୍ଶିତ ହୋଇ ଆଜି ବି ପ୍ରଶଂସା ପାଇ ଚାଲିଛି । ଏହା ମୁଖ୍ୟ ଭୂମିକାରେ ଦୀପନ୍ୱିତ, ବର୍ଷା ପଟ୍ଟନାୟକ, ଜୟପ୍ରକାଶ ଓ ସିଦ୍ଧାନ୍ତ ମହାପାତ୍ରଙ୍କ ଅଭିନୟ ବହୁତ ଉଚ୍ଚକୋଟୀର ଥିଲା ।