ଶେରଗଡ଼/ହିଞ୍ଜିଳିକାଟୁ,୨୩/୦୪: ହିଞ୍ଜିଳିରୁ ଆରମ୍ଭ ହେବ ଶଙ୍ଖନାଦ । ଏଇଠୁ ପ୍ରଚାର ଶୁଭ ପଡ଼ିବ । ଏହାକୁ ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନିଜ ନିର୍ବାଚନମଣ୍ଡଳୀରୁ ସେ ପ୍ରଚାର ଶଙ୍ଖ ଫୁଙ୍କିବେ । ଏଥିଲାଗି ସମସ୍ତ କାର୍ଯ୍ୟସୂଚୀ ଚୂଡ଼ାନ୍ତ ସରିଛି ।
ଆସନ୍ତା ବୁଧବାର ମୁଖ୍ୟମନ୍ତ୍ରୀ ହିଞ୍ଜିଳି ନିର୍ବାଚନମଣ୍ଡଳୀ ଗସ୍ତରେ ଆସୁଛନ୍ତି । ହିଞ୍ଜିଳିକାଟୁ ଓ ଶେରଗଡ଼ଠାରେ ସେ ୨ଟି ସମାବେଶରେ ଯୋଗଦେବେ । ଦଳୀୟ ସୂତ୍ରରୁ ଏହି ସୂଚନା ମିଳିଛି । ରାଜ୍ୟରେ ବିଜେଡିର ଏକ ନମ୍ବର ଷ୍ଟାର୍ କ୍ୟାମ୍ପେନର୍ଙ୍କ ଦ୍ୱାରା ପ୍ରଚାରର ଏହା ବିଧିବଦ୍ଧ ଆରମ୍ଭ ବୋଲି କୁହାଯାଉଛି । ପ୍ରିୟ ମୁଖ୍ୟମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ ସଫଳ କରିବାକୁ ନିର୍ବାଚନମଣ୍ଡଳୀର ନେତା ଓ କର୍ମୀ ଅଣ୍ଟା ଭିଡ଼ିଛନ୍ତି । ସବୁ କାର୍ଯ୍ୟ ସୁରୁଖୁରୁରେ ସାରିବାକୁ ଜୋରସୋରରେ ଲାଗିଛନ୍ତି । ମୁଖ୍ୟମନ୍ତ୍ରୀଙ୍କ ବିଜୟ ପାଇଁ ଦଳୀୟ ନେତା ଓ କର୍ମୀ ବିଭିନ୍ନ ମନ୍ଦିରରେ ପୂଜାର୍ଚ୍ଚନା କରିଛନ୍ତି ।
ହିଞ୍ଜିଳିକାଟୁ ସହରର ମା’ କନକଦୁର୍ଗା ମନ୍ଦିର, ନୂଆଗଡ଼ ଶିବ ମନ୍ଦିର ଓ ବଇଁଚବଣିଆ ଗୀତା ମନ୍ଦିର ସମେତ ଉଭୟ ବ୍ଲକ୍ର ବିଭିନ୍ନ ଧାର୍ମିକ ପୀଠରେ ଯଜ୍ଞ ଓ ପୂଜା କରିଛନ୍ତି । ୨୪ ବର୍ଷ ଧରି ଏହି ଅଞ୍ଚଳରୁ ନିର୍ବାଚନ ପ୍ରତିନିଧିତ୍ୱ କରି ନବୀନ ପଟ୍ଟନାୟକ କୃତାର୍ଥ କରିଛନ୍ତି । ଆଧୁନିକ ଓଡ଼ିଶାର ଉନ୍ନତିର ପ୍ରମୁଖ ବିନ୍ଧାଣୀଙ୍କ ଦୀର୍ଘ ଓ ନିରାମୟ ଜୀବନ କାମନା ସହ ରେକର୍ଡ ଭୋଟ୍ରେ ବିଜୟ କାମନା କରାଯାଇଥିବା କହିଛନ୍ତି ହିଞ୍ଜିଳି ପୌରାଧ୍ୟକ୍ଷ ସୁବାସ ଚନ୍ଦ୍ର ପଲେଇ । ସେହିପରି ବୁଧବାର ମୁଖ୍ୟମନ୍ତ୍ରୀଙ୍କ ହିଞ୍ଜିଳି ସମାବେଶ ସଫଳ କରିବାକୁ ଆଜି ପୂଜା କରାଯାଇଛି ବୋଲି କହିଛନ୍ତି କାଉନ୍ସିଲର୍ ବିଭୁପ୍ରସାଦ ପଣ୍ଡା ଓ ଜିଲ୍ଲା ବିଜେଡି ନେତା ପ୍ୟାରୀମାହନ ପାଢ଼ୀ ।
ଏହା ପୂର୍ବରୁ ନିର୍ବାଚନମଣ୍ଡଳୀ ଅନ୍ତର୍ଗତ ସମସ୍ତ ଜିଲ୍ଲା ପରିଷଦ ଜୋନ୍ ଓ ହିଞ୍ଜିଳି ପୌରପାଳିକାର ନେତା, କର୍ମୀ, ନିର୍ବାଚିତ ପ୍ରତିନିଧି ଭୁବନେଶ୍ୱର ନବୀନ ନିବାସ ଯାଇ ବିଜୟ ପାଇଁ ରଣକୌଶଳ ଗ୍ରହଣ କରିଥିଲେ । ପରେ ଯୁବ ବିଜେଡି ସମାବେଶ, ମହିଳା ବିଜେଡି ସମାବେଶ ଆୟୋଜିତ ହୋଇଛି । ଏବେ ମୁଖ୍ୟମନ୍ତ୍ରୀ ହିଞ୍ଜିଳି ଗସ୍ତ କରି ଦଳୀୟ ନେତା ଓ କର୍ମୀଙ୍କୁ ଉତ୍ସାହିତ କରିବା ସହ ନିର୍ବାଚନମଣ୍ଡଳୀର ଭୋଟର୍ଙ୍କ ଆଶୀର୍ବାଦ କାମନା କରିବେ ।
୨୦୦୦ ମସିହାରୁ ହିଞ୍ଜିଳି ବିଧାନସଭା ଆସନରୁ ପ୍ରତିନିଧିତ୍ୱ କରି ଆସୁଛନ୍ତି ମୁଖ୍ୟମନ୍ତ୍ରୀ । ହିଞ୍ଜିଳିରୁ ଲଢ଼ିବା ସହ କଣ୍ଟାବାଞ୍ଜିରେ ମଧ୍ୟ ଲଢ଼ିବାକୁ ଯାଉଛନ୍ତି । ପୂର୍ବଥର ହିଞ୍ଜିଳି ସହ ସେ ବିଜେପୁର ଆସନରୁ ପ୍ରାର୍ଥୀ ହୋଇଥିଲେ । ହିଞ୍ଜିଳିରେ ମେ’ ୨୦ରେ ଭୋଟ୍ ହେବ । ମୁଖ୍ୟମନ୍ତ୍ରୀ ସମ୍ଭବତଃ ୩୦ ତାରିଖରେ ନାମାଙ୍କନ କରିପାରନ୍ତି । ଏହାର ପ୍ରାୟ ସପ୍ତାହକ ପୂର୍ବରୁ ସେ ହିଞ୍ଜିଳି ଓ ଶେରଗଡ଼ ବ୍ଲକ୍ରେ ପୃଥକ୍ ସମାବେଶ କରି କ୍ୟାମ୍ପେନିଂ ଜୋରଦାର କରିବେ । ଅପରପକ୍ଷେ ହିଞ୍ଜିଳିରେ ଏଯାବତ୍ ବିଜେପି ବା କଂଗ୍ରେସ ପକ୍ଷରୁ ପ୍ରଚାର ତ୍ୱରାନ୍ୱିତ ହୋଇନି । ବିଜେଡି ଆରମ୍ଭରୁ ମୁଖ୍ୟମନ୍ତ୍ରୀଙ୍କୁ ନେଇ ଜୋରଦାର ଢଙ୍ଗରେ ପ୍ରଚାର ଆରମ୍ଭ କରିବାକୁ ଯାଉଛି । ଭୋଟରଙ୍କ ଅଧିକ ନିକଟତର ହେବାକୁ ଚେଷ୍ଟା କରୁଥିବା ଆଲୋଚନା ହେଉଛି।