ଭୋପାଳ,୦୫/୦୫: ମଧ୍ୟପ୍ରଦେଶର ଶ୍ୟୋପୁର ଜିଲ୍ଲାରେ ଥିବା କୁନୋ ଜାତୀୟ ଉଦ୍ୟାନରୁ ଏକ ଅଣ୍ଡିରା ଚିତା ପବନ ଓ ମାଈ ଚିତା ବୀରା ଖସି ପଳାଇଛନ୍ତି । ପବନ ୫୦ କି.ମି. ଦୂର ଚମ୍ବଲ ନଦୀ ପାର ହୋଇ ରାଜସ୍ଥାନର କରୌଲି ଜିଲ୍ଲାରେ ପହଞ୍ଚିଛି । ଜିଲ୍ଲାର ସିମାର ଅଞ୍ଚଳରେ ପବନ ପ୍ରାୟ ୧୦ ଘଣ୍ଟା ଧରି ବୁଲିଥିଲା । ଯାହାଫଳରେ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଥିଲା । ଖବର ପାଇ କୁନୋ ବନ୍ୟପ୍ରାଣୀ ବିଶେଷଜ୍ଞ ଟିମ୍ ସେଠାରେ ପହଞ୍ଚି ତାକୁ ଟ୍ରାଙ୍କୁଲାଇଜ୍ କରି ପୁଣି ଫେରାଇ ଆଣିଛନ୍ତି ।
ବନ ବିଭାଗର ସୂଚନା ଅନୁସାରେ ସିମାର ଗାଁ ନିକଟରେ ସକାଳୁ ପବନକୁ ଦେଖିବାକୁ ମିଳିଥିଲା । ପବନ ଚାଷ ଜମିରେ ଶୋଇଥିବା ସ୍ଥାନୀୟ ଲୋକେ ଦେଖଇବାକୁ ପାଇଥିଲେ । ତେଣୁ ସେମାନେ ଠେଙ୍ଗାବାଡି ଧରି ଚିତାକୁ ଘଉଡାଇବାକୁ ଆସିଥିଲେ । ଆଖପାଖ ଅଞ୍ଚଳରେ ଏହି ଖବର ପହଞ୍ଚି ଯାଇଥିଲା । ଅନ୍ୟ ଗାଁର ଲୋକମାନେ ମଧ୍ୟ ଠେଙ୍ଗାବାଡି ଧରି ବାହାରକୁ ବାହାରିଥିଲେ । ସୂଚନା ମିଳିବା ପରେ ସ୍ଥାନୀୟ ପୁଲିସ ଓ ବନ ବିଭାଗର ଟିମ୍ ସେଠାରେ ପହଞ୍ଚିଥିଲେ । ସେମାନେ ଚିତାକୁ ଜନବସତି ଅଞ୍ଚଳରୁ ଦୂରେଇ ରଖିବାକୁ ଯଥାସମ୍ଭବ ପ୍ରୟାସ କରିଥିଲେ । ଏଥିସହ ସେମାନେ ଚିତାକୁ ଧରିବାକୁ ପ୍ରଥମେ ଉଦ୍ୟମ କରିଥିଲେ । ହେଲେ ବିଫଳ ହୋଇଥିଲେ । ତେଣୁ କୁନୋ ଜାତୀୟ ଉଦ୍ୟାନ କର୍ତ୍ତୃପକ୍ଷଙ୍କୁ ସୂଚନା ଦେଇଥିଲେ । କୁନୋ ଜାତୀୟ ଉଦ୍ୟାନରୁ ବିଶେଷଜ୍ଞ ଟିମ୍ ସେଠାରେ ପହଞ୍ଚି ପବନକୁ ଟ୍ରାଙ୍କୁଲାଇଜ କରିବା ପରେ ଧରିଥିଲେ ।
ଅନ୍ୟପକ୍ଷରେ ମାଈ ଚିତା ବୀରାକୁ ମୁରୈନା ଜିଲ୍ଲାର ଆଖପାଖ ଅଞ୍ଚଳରେ ଠାବ କରାଯାଇଛି । ତାକୁ ସେଠାରୁ ଆଣିବା ଲାଗି ଉଦ୍ୟମ କରାଯାଉଛି । ବନବିଭାଗ ଟିମ୍ ଓ ବିଶେଷଜ୍ଞ ଟିମକୁ ଘଟଣାସ୍ଥଳକୁ ପଠାଯାଇଛି । ସ୍ଥାନୀୟ ଲୋକମାନଙ୍କୁ ସତର୍କ ରହିବାକୁ ମଧ୍ୟ ପରାମର୍ଶ ଦିଆଯାଇଛି । କୁନୋ ଜାତୀୟ ଉଦ୍ୟାନରୁ ଚିତା ଅନ୍ୟତ୍ର ପଳାଇବା ଏହା ପ୍ରଥମ ଘଟଣା ନୁହେଁ । ୪ମାସ ପୂର୍ବରୁ ଏକ ଚିତା ଏଠାରୁ ଖସି ରାଜସ୍ଥାନ ଓ ମଧ୍ୟପ୍ରଦେଶ ସୀମାନ୍ତବର୍ତ୍ତୀ ବାରନ ଜିଲ୍ଲାରେ ପହଞ୍ଚିଥିଲା । ସେଠାରୁ ତାକୁ ଟ୍ରାଙ୍କୁଲାଇଜ କରି କୁନୋକୁ ଅଣାଯାଇଥିଲା । ପ୍ରୋଜେକ୍ଟ ଚିତା ଅଧୀନରେ ୨୦୨୨ରେ ନାମ୍ବିଆରୁ ୮ ଏବଂ ୨୦୨୩ରେ ଦକ୍ଷିଣ ଆଫ୍ରିକାରୁ ୧୨ଟି ଚିତା ଅଣାଯାଇ କୁନୋରେ ଛଡାଯାଇଛି ।
