a ଖାଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜର ହତ୍ୟା ମାମଲାରେ ଶୁକ୍ରବାର ଦିନ କାନାଡା ପୋଲିସ ତିନି ସନ୍ଦିଗ୍ଧଙ୍କୁ ଗିରଫ କରିଛି। ଗିରଫ ତିନିଜଣ ଭାରତୀୟ ନାଗରିକ ବୋଲି କୁହାଯାଉଛି। ସେମାନେ ହେଲେ କରନ ବ୍ରାର (୨୨), କମଲପ୍ରୀତ ସିଂ (୨୨) ଓ କରଣପ୍ରୀତ ସିଂ (୨୮)। ଏହି ତିନିଜଣ ପ୍ରାୟ ୩ ରୁ ୫ ବର୍ଷ ହେବ ଆଲବର୍ଟାର ଏଡମୋଣ୍ଟନରେ ରହୁଥିଲେ। ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ ଆରସିଏମ୍‌ପି ଏହି ସୂଚନା ଦେଇଛି। କାନାଡ଼ା ପୁଲିସର କହିବା କଥା ହେଲା ସନ୍ଦିଗ୍ଧ ମାନଙ୍କୁ ପ୍ରଥମ ଡିଗ୍ରୀ ହତ୍ୟା ଏବଂ ହତ୍ୟା ଷଡଯନ୍ତ୍ରରେ ଦୋଷୀ ସାବ୍ୟସ୍ତ କରାଯାଇଛି। ପୋଲିସ କହିଛି ଯେ ଏହି ମାମଲାର ତଦନ୍ତ ଆରମ୍ଭ ହେବା ପୂର୍ବରୁ ପୋଲିସ ଏହି ଲୋକଙ୍କ ବିଷୟରେ ଜାଣି ନଥିଲା।

ଆଇଏଚ୍ଆଇଟି ଅଧିକାରୀ-ଦାୟିତ୍ୱରେ ଥିବା ଅଧୀକ୍ଷକ ମନଦୀପ ମୁକର ଏବଂ ଆରସିଏମ୍‌ପି ଆସିଷ୍ଟାଣ୍ଟ କମିଶନର ଡେଭିଡ ଟେବୌଲ ଏବଂ ବ୍ରାଏନ ଏଡୱାର୍ଡସ ସାମ୍ବାଦିକଙ୍କ ସହ କଥାବାର୍ତ୍ତା ବେଳେ ଏହି ତିନି ଅଭିଯୁକ୍ତଙ୍କ ଗିରଫଦାରୀକୁ ନିଶ୍ଚିତ କରିଛନ୍ତି। ସୂଚନାନୁସାରେ, କାନାଡା ପୋଲିସ ଏହି ତିନିଜଣ ସନ୍ଦିଗ୍ଧଙ୍କୁ ଚିହ୍ନଟ କରିସାରିଛି ଏବଂ ସେମାନଙ୍କ ଉପରେ ନିରନ୍ତର ନଜର ରଖିଛି। ସର୍ଚ୍ଚ ଅପରେସନ ବେଳେ ପୋଲିସ ଏହି ତିନିଜଣଙ୍କୁ ଗିରଫ କରିଥିଲା। ଏହି ତିନିଜଣଙ୍କୁ ଭାରତୀୟ ନାଗରିକ ବୋଲି ଚିହ୍ନଟ କରାଯାଇଛି। ସୂଚନାଥାଉକି ଜୁନ୍ ୨୦୨୩ ରେ, ଖାଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରକୁ କାନାଡାର ବ୍ରିଟିଶ କଲମ୍ବିଆର ଗୁରୁଦ୍ୱାର ବାହାରେ ସର୍ବସାଧାରଣରେ ଗୁଳି କରି ହତ୍ୟା କରାଯାଇଥିଲା। ଏହି ହତ୍ୟାକାଣ୍ଡ ପାଇଁ କାନାଡା ଭାରତକୁ ଦାୟୀ କରିଥିଲା।

ଖାଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରର ହତ୍ୟା ପାଇଁ କାନାଡା କ୍ରମାଗତ ଭାବେ ଭାରତକୁ ଦାୟୀ କରୁଛି। ଗତ ବର୍ଷ କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ନିଜ୍ଜର ହତ୍ୟାରେ ଭାରତର ସମ୍ପୃକ୍ତି ଥିବା ଅଭିଯୋଗ କରିଥିଲେ। ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ସେପ୍ଟେମ୍ବରରେ ଘୋଷଣା କରିଛନ୍ତି ଯେ କାନାଡା କର୍ତ୍ତୃପକ୍ଷ ଭାରତୀୟ ସରକାରୀ ଏଜେଣ୍ଟଙ୍କ ଦ୍ୱାରା କାନାଡା ନାଗରିକ ନିଜ୍ଜରକୁ ଗୁଳିରେ କରି ହତ୍ୟା ମାମଲାରେ କୌଣସି ସମ୍ଭାବ୍ୟ ଲିଙ୍କ ଯାଞ୍ଚ କରୁଛନ୍ତି। ତେବେ ଭାରତ ଏହାକୁ ସମ୍ପୂର୍ଣ୍ଣ ଅବୈଧ ଏବଂ ଭିତ୍ତିହୀନ କହି ପ୍ରତ୍ୟାଖ୍ୟାନ କରିଛି। ତେବେ କାନାଡାର ଏଭଳି ଅଭିଯୋଗ ପରେ ଦୁଇ ଦେଶ ମଧ୍ୟରେ ସମ୍ପର୍କ ଖରାପ ହୋଇ ଏକ ପ୍ରମୁଖ କୂଟନୈତିକ ବିବାଦ ଉପୁଜିଥିଲା।