ମୁମ୍ବାଇ: ବମ୍ବେ ହାଇକୋର୍ଟ ଜେଟ୍ ଏୟାରଓ୍ବେଜ୍ର ପ୍ରତିଷ୍ଠାତା ନରେଶ ଗୋୟଲଙ୍କୁ ଦୁଇ ମାସ ଲାଗି ଅନ୍ତରୀଣ ଜାମିନ ଦେଇଛନ୍ତି ।ସ୍ବାସ୍ଥ୍ୟଗତ କାରଣ ଯୋଗୁ ତାଙ୍କୁ ଏହି ଅନ୍ତରୀଣ ଜାମିନ ମିଳିଥିବା ଜଣାପଡ଼ିଛି । ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ବାରା ଗିରଫ ହୋଇ ଜେଲ ଯାଇଥିଲେ ନରେଶ ଗୋୟଲ । ତାଙ୍କୁ ଆଜି ବମ୍ବେ ହାଇକୋର୍ଟର ଜଷ୍ଟିସ୍ ଏନଜେ ଜାମାଦାରଙ୍କ ଖଣ୍ଡପୀଠ ଏକ ଲକ୍ଷ ଟଙ୍କାର ମୁଚାଲିକାରେ ଜାମିନ ପ୍ରଦାନ କରିଛନ୍ତି । ଏହା ସହ କୋର୍ଟଙ୍କ ବିନା ଅନୁମତିରେ ମୁମ୍ବାଇରୁ ବାହାରକୁ ଯାଇପାରିବେ ନାହିଁ ବୋଲି ନରେଶଙ୍କୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି ।
ଏପରିକି ତାଙ୍କୁ ନିଜର ପାସପୋର୍ଟ ଜିମା ଦେବାକୁ କୁହାଯାଇଛି । ନରେଶ ଗୋୟଲ ଏବଂ ତାଙ୍କ ପତ୍ନୀ ଅନୀତା ଉଭୟ କର୍କଟ ରୋଗରେ ପୀଡ଼ିତ ଅଛନ୍ତି । ଏହାକୁ ନେଇ ୭୫ ବର୍ଷୀୟ ନରେଶ ଗୋୟଲ ସ୍ବାସ୍ଥ୍ୟବସ୍ଥା ଏବଂ ମାନବତା ଦୃଷ୍ଟିରୁ ତାଙ୍କୁ ଅନ୍ତରୀଣ ଜାମିନ ପ୍ରଦାନ କରାଯିବା ଉଚିତ ବୋଲି ସେ କୋର୍ଟରେ ଆବେଦନ କରିଥିଲେ ।
ସୂଚନାଯୋଗ୍ୟ, ୫୩୮ କୋଟି ଟଙ୍କା ହେରଫେର ମାମଲାରେ ୨୦୨୩ ସେପ୍ଟେମ୍ବରରେ ଇଡି ନରେଶ ଗୋୟଲଙ୍କୁ ଗିରଫ କରିଥିଲା । ଏହି ମାମଲାରେ ଇଡି ଚାର୍ଜସିଟ୍ ଦାଖଲ କରିବା ପରେ ନରେଶଙ୍କ ପତ୍ନୀ ଅନୀତାଙ୍କ ସଂପୃକ୍ତି ନେଇ ଜଣାପଡ଼ିଥିଲା । ଏହା ପରେ ନଭେମ୍ବର ମାସରେ ଅନୀତା ଗୋୟଲଙ୍କୁ ଗିରଫ କରିଥିଲା ଇଡି । କିନ୍ତୁ ତାଙ୍କର ଅଧିକ ବୟସ ଏବଂ ଖରାପ ସ୍ବାସ୍ଥ୍ୟବସ୍ଥା କାରଣରୁ ତାଙ୍କୁ ସେହି ଦିନ ଜାମିନ ମିଳିଯାଇଥିଲା ।
