ରାଜସ୍ଥାନ ୨୭/୦୪: ରାସ୍ତା କଡ଼ରେ ଛୋଟ ଛୋଟ ପାନ ଦୋକାନକରି ଲୋକମାନେ ପରିବାର ପୋଷଣ କରୁଥିବା ଆପଣମାନେ ଦେଖିଥିବେ । ସ୍ଥଳ ବିଶେଷରେ ପାନ ସହିତ କିଛି ଚଟ୍ପଟା ସାମଗ୍ରୀ ବି ସେମାନେ ବିକ୍ରି କରିଥାନ୍ତି । ତେବେ ସେହି ପାନ ଦୋକାନୀମାନଙ୍କର ଆର୍ଥିକ ସ୍ଥିତି ସେତେ ବେଶୀ ଭଲ ହୋଇନଥାଏ । ଏପରିସ୍ଥଳେ ରାଜସ୍ଥାନ ବିକାନେର ସଟ୍ଟା ବଜାରର ଜଣେ କୋଟିପତି ପାନ ଦୋକାନୀ ଫୁଲଚାନ୍ଦ ଚର୍ଚ୍ଚାରେ ଅଛନ୍ତି ।
ଫୁଲଚାନ୍ଦ ୨ କିଲୋରୁ ଅଧିକ ସୁନା ପିନ୍ଧି ପ୍ରତିଦିନ ପାନ ବିକ୍ରି କରିଥାନ୍ତି । ସେଥିମଧ୍ୟରେ ଅନେକ ଗୁଡ଼ିଏ ସୁନା ହାର, ବ୍ରେସଲେଟ୍, ସୁନା ବଳା, କାନଫୁଲ, ମୁଦି ପ୍ରଭୃତି ସାମିଲ । ସୁନା ଦାମ୍ ବଢ଼ିଚାଲିବା ସହିତ ତାଙ୍କର ଏହି ଗହଣାଗୁଡି଼କର ମୂଲ୍ୟ ମଧ୍ୟ ବଢ଼ୁଛି । ସେ ପିନ୍ଧିଥିବା ଗହଣାର ମୂଲ୍ୟ ଏବେ ପ୍ରାୟ ୨ କୋଟିରୁ ଅଧିକ ଟଙ୍କା ହେବ ବୋଲି ଫୁଲଚାନ୍ଦ କହନ୍ତି। ସଟ୍ଟାବଜାରରେ ତାଙ୍କର ‘ମୁଲସା ଫୁଲସା’ ପାନ ଦୋକାନ ନାଁରେ ଏକ ଦୋକାନ ଥିବାବେଳେ ପାନ ଖାଇବା ସହିତ ପାନଦୋକାନୀଙ୍କର ଏକ ଝଲକ ପାଇବାକୁ ଲୋକେ ସେଠାକୁ ଆସିଥାନ୍ତି । ବିଶେଷ କରି ସ୍ଥାନୀୟ ଅଞ୍ଚଳକୁ ଆସୁଥିବା ପର୍ଯ୍ୟଟକମାନଙ୍କର ତାଙ୍କ ନିକଟରେ ଭିଡ଼ ଜମିଥାଏ । ଫୁଲଚାନ୍ଦଙ୍କ ପରିବାରର ପୂର୍ବରୁ ପାନ ବ୍ୟବସାୟ ଥିଲା । ତାଙ୍କର ବାପା ଓ ଦାଦା ଏହି ବ୍ୟବସାୟ କରୁଥିଲେ ।
ସେହି ବ୍ୟବସାୟରୁ ସେମାନେ ବେଶ୍ ସମୃଦ୍ଧ ହୋଇପାରିଥିଲେ । ତେଣୁ ବଡ଼ ହେବା ପରେ ସେ ସେହି ପେସାକୁ ଆଦରି ନେଲେ । ଏବେ ଏହି କାମରେ ତାଙ୍କ ପୁଅ ଓ ତାଙ୍କ ଭାଇଙ୍କ ପୁଅମାନେ ତାଙ୍କୁ ସହଯୋଗ କରୁଛନ୍ତି । ଫୁଲଚାନ୍ଦଙ୍କ ଦୋକାନରେ ବିଭିନ୍ନ ପ୍ରକାର ପାନ ଉପଲବ୍ଧ ହୋଇଥାଏ । ଦାମ୍ ମଧ୍ୟ ୧୫-୨୦ ଟଙ୍କା ମଧ୍ୟରେ ରହୁଥିବାରୁ ପାନପ୍ରିୟ ଲୋକଙ୍କର ଗହଳି ଲାଗି ରହେ ତାଙ୍କ ଦୋକାନରେ । ସୁନା ଗହଣା ପିନ୍ଧି ଫୁଲଚାନ୍ଦ ପାନ ବିକ୍ରି କରୁଥିବାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ୍ ହେଉଛି । ତାକୁ ବହୁ ସଂଖ୍ୟାରେ ଲୋକେ ଲାଇକ୍ କରିଛନ୍ତି ।