ନୂଆଦିଲ୍ଲୀ: ଅଷ୍ଟ୍ରେଲିଆର ମହିଳା ସାଂସଦ ବ୍ରିଟାନି ଲାଉଗା ଏକ ବଡ ଅଭିଯୋଗ ଆଣିଛନ୍ତି, ଯାହା ଏବେ ଏକ ସମ୍ବେଦନଶୀଳତା ସୃଷ୍ଟି କରିଛି । ଲାଉଗା ଅଭିଯୋଗ କରିଛନ୍ତି ଯେ ତାଙ୍କୁ ନିଶାଜାତୀୟ ପଦାର୍ଥ ଦେଇ ଯୌନ ନିର୍ଯ୍ୟାତନା ଦିଆଯାଇଛି । ଏନେଇ ସାଂସଦ ବ୍ରିଟାନି ଲାଉଗା ଏକ ଫେସବୁକ୍ ପୋଷ୍ଟରେ କହିଛନ୍ତି ଯେ, ଉପକୂଳବର୍ତ୍ତୀ ସହର ୟେପୁନରେ ତାଙ୍କ ସହିତ ଅନ୍ୟ ଅନେକ ମହିଳାଙ୍କୁ ନିଶା ଜାତୀୟ ପଦର୍ଥ ଦିଆଯାଇଥିଲା ଏବଂ ଯୌନ ଉତ୍ପିଡନ ସହ ମାଡ ମଧ୍ୟ ମରାଯାଇଥିଲା । ଦ ଗର୍ଜିଆନର ରିପୋର୍ଟ ଅନୁଯାୟୀ ବ୍ରିଟେନୀ ଲାଉଗା ଅଭିଯୋଗ ଆଣିଛନ୍ତି ଯେ,ଗତ ସପ୍ତାହ ଶେଷରେ ଦେଶର ମଧ୍ୟ କୁଇନ୍ସଲ୍ୟାଣ୍ଡ ସହର ୟେପୁନରେ ତାଙ୍କୁ ନିଶା ଜାତୀୟ ପଦାର୍ଥ ଦିଆଯାଇଥିଲା ଏବଂ ତାଙ୍କୁ ଯୌନ ନିର୍ଯାତନା ଦିଆଯାଇଥିଲା ।
ଫେସବୁକରେ ୩୭ ବର୍ଷୀୟ ସାଂସଦ ବ୍ରିଟାନି ଲାଉଗାଙ୍କ ଏହି ପୋଷ୍ଟ ଆସିବା ପରେ ଆଲୋଡ଼ନ ସୃଷ୍ଟି ହୋଇଛି । ବ୍ରିଟାନି କହିଛନ୍ତି ଯେ ରବିବାର ସକାଳେ ଡ୍ରଗ୍ସ ଏବଂ ଯୌନ ନିର୍ଯାତନା ପରେ ମୁଁ ୟେପୁନ୍ ପୋଲିସ୍ ଷ୍ଟେସନ୍ ଏବଂ ୟେପୁନ୍ ହସ୍ପିଟାଲକୁ ଯାଇଥିଲି । ହସ୍ପିଟାଲରେ ହୋଇଥିବା ପରୀକ୍ଷା ମୋ ଶରୀରରେ ଡ୍ରଗ୍ସର ଉପସ୍ଥିତି ନିଶ୍ଚିତ କରିଥିଲା, ଯାହା ମୁଁ ନିଜେ ନେଇ ନଥିଲି । ଏହି ପଦାର୍ଥ ମୋ ଉପରେ ବହୁତ ପ୍ରଭାବ ପକାଇଲା । ଫେସବୁକରେ ଏକ ଲମ୍ବା ପୋଷ୍ଟରେ ଲାଉଗା କହିଛନ୍ତି ଯେ, ପୋଲିସର ତଦନ୍ତ ଚାଲିଛି ।
ବ୍ରିଟାନି ଲାଉଗା କହିଛନ୍ତି ଯେ ଏହା ମୋ ସହ ଏବଂ ଅନେକ ମହିଳାଙ୍କ ସହ ଘଟିଛି। ସେମାନଙ୍କ ମଧ୍ୟରୁ ଅନେକ ମଧ୍ୟ ମୋ ସହିତ ଯୋଗାଯୋଗ କରିଥିଲେ । ଏହା କାହା ସହିତ ହୋଇପାରେ ଏବଂ ଦୁଃଖର ବିଷୟ ଏହା ଆମମାନଙ୍କ ମଧ୍ୟରୁ ଅନେକଙ୍କ ସହିତ ଘଟିଛି । କିନ୍ତୁ ଏହା ଠିକ ନୁହେଁ ।
