ପୁରୀ,୧୦/୦୫: ମହାପ୍ରଭୁଙ୍କ ୪୨ ଦିନିଆ ଚନ୍ଦନ ଯାତ୍ରା ଶୁକ୍ରବାର ପବିତ୍ର ଅକ୍ଷୟ ତୃତୀୟାଠାରୁ ଆରମ୍ଭ ହେବ । ନରେନ୍ଦ୍ର ଜଳରେ ମହାପ୍ରଭୁ ପ୍ରଥମ ୨୧ ଦିନ ଚାପ କ୍ରୀଡ଼ା କରିବେ । ସାଥୀରେ ଥିବେ ଶ୍ରୀଦେବୀ ଭୂଦେବୀ, ରାମକୃଷ୍ଣଙ୍କ ସମେତ ପଞ୍ଚ ମହାଦେବ । ଏଣୁ ପ୍ରସ୍ତୁତିରେ ଶେଷ ସ୍ପର୍ଶ ଦେଇଛି ପ୍ରଶାସନ । ଠାକୁରଙ୍କ ବିଶ୍ୱ ପ୍ରସିଦ୍ଧ ଚନ୍ଦନ ଯାତ୍ରା ପାଇଁ ଝଲସୁଛି ନରେନ୍ଦ୍ର ପରିସର । ଠାକୁରଙ୍କ ରୁପା ସିଂହାସନ ଓ ପଲଙ୍କ ଶ୍ରୀମନ୍ଦିରର ମହାପ୍ରସାଦ ବାହକ(ବୋଝିଆ)ମାନେ ଆଣି ନରେନ୍ଦ୍ର ଚକଡ଼ାରେ ପହଞ୍ଚାଇଛନ୍ତି । ଭୋଇ ସେବକମାନେ ବଡ଼ଦାଣ୍ଡରେ ଠାକୁରଙ୍କ ପନ୍ତି ଘର ତିଆରିଛନ୍ତି । ରଙ୍ଗ ହୋଇ ସୁସଜ୍ଜିତ ରହିଛନ୍ତି ନନ୍ଦ୍ରା ଭଦ୍ରା । ମଣ୍ଡଣୀ କାର୍ଯ୍ୟକୁ ଦର୍ଜୀସେବକଙ୍କ ଅପେକ୍ଷା । ସମୟ ପୂର୍ବରୁ ସମସ୍ତ କାର୍ଯ୍ୟ ସାରିବାକୁ ପ୍ରଶାସନିକ କର୍ମଚାରୀ ତଦାରଖ କରୁଛନ୍ତି ।
ମଧ୍ୟାହ୍ନରେ ବୋଝିଆମାନେ ଶ୍ରୀମନ୍ଦିର କାର୍ଯ୍ୟାଳୟରୁ ରୁପା ସିଂହାସନ ଓ ପଲଙ୍କ, ଖଟ ପଲଙ୍କ ଆଦି ନରେନ୍ଦ୍ର ପରିସରକୁ ବୋହି ନେଇଥିଲେ। ସେଠାରେ ଜେଟିପି କର୍ମଚାରୀଙ୍କ ଜିମା ଦିଆଯାଇଥିଲା ସମସ୍ତ ଜିନିଷ । ଘୋର କାନନରେ ଠାକୁରଙ୍କ ଚନ୍ଦନ ଘର । ପ୍ରସ୍ତୁତ ରହିଛି ଚନ୍ଦନ କୁଣ୍ଡ । ସୁବାସିତ ଜଳରେ ଦଶଦିଅଁ ଜଳକ୍ରୀଡ଼ା କରିବେ । ଭଜନ ମଣ୍ଡପ ଓ ଠାକୁରଙ୍କ ମହିମା ପୁସ୍ତିକା ପାଇଁ ମଞ୍ଚ ପ୍ରସ୍ତୁତ ହୋଇଛି । ଜଳରେ ନିର୍ମିତ ଅସ୍ଥାୟୀ ପ୍ଲାଟଫର୍ମରେ କନା ଘେରା ଯାଇଛି । ଚିତ୍ରକର ସେବକଙ୍କ କାର୍ଯ୍ୟ ଶେଷ । ନରେନ୍ଦ୍ର ପୁଷ୍କରିଣୀ ଚତୁଃପାଶ୍ୱର୍ରେ ଉଜ୍ୱଳ ଆଲୋକ ଲାଗିଛି । ଚାପରେ କନାମଣ୍ଡଣୀ ସରିଲେ ପ୍ରସ୍ତୁତି ସରିବ । ବାହାର ଚନ୍ଦନ ଯାତ୍ରା ପରେ ଶ୍ରୀମନ୍ଦିରରେ ମହାପ୍ରଭୁଙ୍କ ଏକୋଇଶି ଦିନ ଭିତର ଚନ୍ଦନ ଯାତ୍ରା ଅନୁଷ୍ଠିତ ହେବ ।