ଗୁଜୁରାଟ : ଗୁଜୁରାଟର ପ୍ରସିଦ୍ଧ ୯୦ ବର୍ଷିୟ ଯୋଗୀ ପ୍ରହଲ୍ଲାଦ ଜାନୀ ଓରଫ୍ ଚୁନରୀବାଲା ମାତାଜୀଙ୍କର ମଙ୍ଗଳବାର ସକାଳେ ଗାନ୍ଧିନଗର ଜିଲ୍ଲା ସ୍ଥିତ ତାଙ୍କ ପୈତୃକ ଗାଁ ଚରାଡ଼ାରେ ମୃତ୍ୟୁ ହୋଇଛି । ସେ ୭୬ ବର୍ଷରୁ ଅଧିକ ସମୟ ଅନ୍ନ-ଜଳ ଗ୍ରହଣ ନକରି ଜୀବିତ ରହିଥିବାର ଦାବି କରୁଥିଲେ । ଗୁଜୁରାଟରେ ବହୁ ସଂଖ୍ୟାରେ ତାଙ୍କର ଅନୁଗାମୀ ତଥା ଶିଷ୍ୟ ଅଛନ୍ତି ।
ଶିଷ୍ୟଙ୍କ ତରଫରୁ ଜାରି ଏକ ବୟାନ ଅନୁସାରେ , ଯାନି ପୈତୃକ ଗାଁରେ କିଛି ସମୟ ବିତେଇବା ପାଇଁ ଇଚ୍ଛା ପ୍ରକଟ କରିଥିଲେ । ଏଣୁ ଶ୍ରଦ୍ଧାଞ୍ଜଳି ପାଇଁ ତାଙ୍କର ପାର୍ଥିବ ଶରୀର ବନାସକାଣ୍ଠା ଜିଲ୍ଲାରେ ଅମ୍ୱାଜୀ ମନ୍ଦିରର ପାଖ ଆଶ୍ରମରେ ରଖାଯିବ। ଯେଉଁଠି ଗୁରୁବାର ଦିନ ତାଙ୍କୁ ସମାଧି ଦିଆଯିବ।
ଦେବୀ ମାଆ ଅମ୍ୱାଙ୍କର ଉପାସକ ଜାନୀ ଚୁନରୀ ପିନ୍ଧି ମହିଳାଙ୍କ ପରି ସବୁବେଳେ ରହୁଥିବା କାରଣରୁ ଚୁନରୀବାଲା ନାମରେ ସେ ଚର୍ଚ୍ଚିତ ଥିଲେ ।
ସନ୍ଥ ଜାନୀ ଅନ୍ନ –ଜଳ ଗ୍ରହଣ ନକରି ଜୀବିତ ରହୁଥିବାର ଦାବିକୁ ୨୦୦୩ ଓ ୨୦୧୦ ମସିହାରେ ବୈଜ୍ଞାନିକମାନେ ପରୀକ୍ଷା କରିଥିଲେ । ୨୦୧୦ରେ ଡିଫେନ୍ସ ଇନ୍ଷ୍ଟିଚ୍ୟୁଟ୍ ଅଫ୍ ଫିଜିଓଲୋଜି ଆଣ୍ଡ ଏଲାଇଡ୍ ସାଇନ୍ସେସ (ଡିଆଇପିଏଏସ୍)ର ବୈଜ୍ଞାନିକମାନେ ଏବଂ ଡାକ୍ତରମାନେ ତାଙ୍କର ୧୫ ଦିନ ନିରୀକ୍ଷଣ କରିଥିଲେ ।
ଡିଆଇପିଏଏସ୍ କହିଥିଲା କି ସେ ଭୋକ ଓ ପାଣିକୁ ଦୂରେଇ ବଞ୍ଚିବା ପାଇଁ ତାଙ୍କ ଶରୀରରେ ଏକ ସ୍ୱତନ୍ତ୍ର ପ୍ରକ୍ରିୟା ରହିଛି।
୭୬ ବର୍ଷ ସେ କେବଳ ପବନରେ ଜୀବିତ ରହିଥିଲେ –
ଶିଷ୍ୟମାନେ କହିଛନ୍ତି , ଯୋଗୀ ପ୍ରହଲ୍ଲାଦ ଜାନୀ ଆଧ୍ୟାତ୍ମିକ ଅନୁଭବର ଅନ୍ୱେଷଣରେ ଖୁବ୍ କମ୍ ବୟସରେ ଘର ତ୍ୟାଗ କରିଦେଇଥିଲେ । ୧୪ ବର୍ଷ ବୟସରେ ସେ ଖାଇବା ପିଇବା ମଧ୍ୟ ଛାଡ଼ି ଦେଇଥିଲେ । ସେ ଏମିତି ଜଣେ ଯୋଗୀ ରୂପରେ ଲୋକପ୍ରିୟ ହୋଇଥିଲେ , ଯିଏକି ଖାଲି ପବନ ଦ୍ୱାରା ଜୀବିତ ରହିଥିଲେ । ଶିଷ୍ୟଙ୍କ ଅନୁସାରେ , ସେ ୭୬ ବର୍ଷ ବିନା ଭୋଜନ ଓ ଜଳରେ ବଞ୍ଚିରହିଥିଲେ । ସେ କହୁଥିଲେ ତାଙ୍କୁ ଦେବୀ ମାଆ ଜୀବିତ ରଖିଥିଲେ ।
